ओली सरकारले गरेका ११ राजदूतको नियुक्ति खारेज

३ साउन, काठमाडौं । विगत सरकारले बिना आधार र प्रक्रिया मिचेर गरेको राजदूत नियुक्तिलाई शेरबहादुर देउवा सरकारले रद्ध गरेको छ ।अस्ती शुक्रबार साँझ बसेको मन्त्रिपरिषद बैठकले विभिन्न ११ देशका लागि नियुक्त भएका राजदूतहरुको नियुक्ति रद्ध गरेको हो ।

स्रोतका अनुसार, उनीहरुको एग्रिमोका लागि सम्बन्धित मुलुकमा पत्राचार भइसकेको भएपनि हाललाई रद्ध गरेको हो । सोही बमोजिम आवश्यक प्रक्रिया अघि बढाउने परराष्ट्र मन्त्रालयलाई पत्राचार भएको पनि स्रोतले बताएको छ ।

ओली सरकारले अष्ट्रियाका लागि निर्मलराज काफ्ले, इजिप्टका लागि जीवनप्रकाश श्रेष्ठ, श्रीलंकाका लागि रमेशचन्द्र पौडेल, दक्षिण कोरियाका लागि कृष्णचन्द्र शर्मा, अष्ट्रेलियाका लागि सुुम्निमा तुलाधर, रुसका लागि जंगबहादुर चुहान, म्यानमारका लागि नारायणप्रसाद संग्रौला, बहराइनका लागि युवराज कार्की, ब्राजिलका लागि कुलप्रसाद नेपाल, डेनमार्कका लागि सुमित्रा सुवेदी र साउदी अरबियाका लागि मेराज मुसलमानलाई राजदूत तोकिएको थियो ।

उनीहरुमध्ये अधिकांश ओली निकट पार्टी आबद्ध र कूटनीतिक ज्ञान नभएकाहरु रहेको भन्दै व्यापक आलोचना भएको थियो । कार्कीको नियुक्ति त कानून सम्मत नभएको भन्दै सर्वाेच्च अदालतले नै रोक लगाएको थियो ।