संसदीय दलहरु सक्रियः देउवालाई विश्वासको मत दिने पक्षमा माओवादी र जसपा

३ साउन, काठमाडौं । प्रधानमन्त्री शेरबहादुर देउवाले आजै प्रतिनिधिसभाबाट विश्वासको मत लिने प्रक्रिया अगाडि बढाएपछि राजनीतिक दलहरुले संसदीय दलको बैठक धमाधम गर्न थालेका छन् ।

नेपाली कांग्रेसले दिउँसो २ बजेका लागि आफ्नो संसदीय दलको बैठक बोलाएको छ भने सत्ता घटक नेकपा माओवादी केन्द्रको भर्खरै सम्पन्न बैठकले देउवालाई विश्वासको मत दिने निर्णय गरेको छ ।

त्यसैगरी सत्ता गठबन्धनको अर्काे घटक जनता समाजवादी पार्टीको उपेन्द्र यादव समूहले पनि आजै दलको बैठक डाकेको छ । पार्टीको आधिकारिकता विवादमा सुनुवाई गर्न निर्वाचन आयोग पुुगेका नेताहरु सोझै सिंहदरबारस्थित संसदीय दलको कार्यालयतिर लागेका छन् ।

नेकपा एमालेको संस्थापन पक्षले अस्ती नै बैठक डाकेर देउवाको विपक्षमा मतदान गर्ने निर्णय गरेको छ । तर असन्तुुष्ट नेपाल–खनाल पक्षले भने विश्वासको मतको पक्षमा मतदान गर्ने भएको छ । सर्वाेच्च अदालतले संविधानको धारा ७६ (५) बमोजिमको सरकारलाई मतदान गर्न ह्वीप नलाग्ने फैसला गरेको छ ।