जसपाको पुरै ३२ मत देउवाको पक्षमा, किन भयो ठाकुर पक्ष यूटर्न

३ असार, काठमाडौं । निर्वाचन आयोगमा जनता समाजवादी पार्टी (जसपा) मा को आधिकारिक हो भन्ने गरमागरम बहस चल्दै गर्दा महन्थ ठाकुर पक्षले पनि यूटर्न गर्दै प्रधानमन्त्री शेरबहादुर देउवालाई विश्वासको मत दिने भएको छ ।

उपेन्द्र यादव पक्षको आज बसेको संसदीय दलको वैठकले देउवालाई विश्वासको मत दिने निर्णय गरेको मसी सुक्न नपाउँदै ठाकुर पक्षले पनि देउवालाई सघाउने निर्णय गरेको हो ।

​यसअघि आजै प्रधानमन्त्री देउवाले ठाकुरलाई पत्र नै पठाएर विश्वासको मत दिन आग्रह गरेका थिए । पत्र पठाएपछि कांग्रेस र जसपा ठाकुर पक्षबीच संघीय संसद भवनमा सामान्य छलफल भएको थियो । छलफलमा प्रम देउवाले ठाकुरलाई मधेशको माग पुरा गर्ने आश्वासनसहित मन्त्रीमण्डलमा पनि समावेश गराउने वचन दिएका थिए । देउवाको वचनपछि ठाकुर पक्षले पनि उनलाई विश्वासको मत दिने निर्णय गरेको हो ।

जसपाको उपेन्द्र यादव पक्षका १९ जनाले लिखित हस्ताक्षर गर्दै देउवालाई विश्वासको मत दिने निर्णय गरेका थिए । यसअघि केपी ओलीको पक्षमा लागेर मन्त्रीमण्डलमा समेत सहभागी भएको ठाकुर पक्षलाई सर्वोच्च अदालतले झड्का दिएपछि उनीहरु मन्त्रीमण्डलबाट बाहिरिनु परेको थियो ।

प्रतिनिधिसभा पुनस्थापना पश्चात ठाकुर पक्षका सांसद पनि उपेन्द्र पक्षमा लाग्न थालेपछि उनी थप अप्ठ्रोमा परेका थिए । जसपाका ३२ जना सांसद रहेका छन् ।