मन्त्रीमण्डल विस्तारको कसरत

५ साउन, काठमाडौं । प्रधानमन्त्री शेरबहादुर देउवाले प्रतिनिधिसभामा विश्वासको मत पाएपछि मौजुदा मन्त्रिपरिषद विस्तार गर्ने तयारी तीब्र पारेका छन् ।

साउन ३ गते बसेको प्रतिनिधिसभा बैठकबाट विश्वासको मत हासिल गरेका प्रधानमन्त्री देउवाले हिजै विस्तार गर्ने कसरत गरेका थिए । तर सत्ता साझेदार गठबन्धनमा केही विषय अझै मिलाउन बाँकी रहेकाले विस्तारमा केही ढिलाई हुने देखिएको छ ।

खासगरी नेकपा एमालेको माधवकुमार नेपाल समूहलाई समेत सामेल गर्ने गठबन्धनको चाहना रहेको तर नेता नेपालले केही समय माग गरेकाले ढिलाई भएको बताइएको छ ।

यसै प्रसंगमा छलफल गर्न गठबन्धनका दुई नेताले आज एमाले वरिष्ठ नेता नेपालसँग बिहानै भेट गरेका छन् । आज नेकपा माओवादी केन्द्रका अध्यक्ष पुष्पकमल दाहाल प्रचण्ड र जनता समाजवादी पार्टी अध्यक्ष उपेन्द्र यादवले नेता नेपालसँग बेग्लाबेग्लै भेट गरेका छन् ।

दुबै नेताले सत्ता समीकरण र एमालेको विवादका विषयमा छलफल गरेको स्रोतको भनाई छ । नेता नेपालले प्रचण्ड र यादवलाई केही समय पर्खन आग्रह गरेको बताइएको छ ।

यसैबीच माओवादी अध्यक्ष प्रचण्ड प्रधानमन्त्री देउवालाई भेट्न अहिले बालुवाटार पुगेका छन् । एमाले नेता नेपालसँगको छलफलपछि उनी बालुवाटार गएका हुन् ।

सरकार विस्तार गरी द्रुत गतिमा काम गर्न अब ढिला गर्न नहुने पनि प्रचण्डको धारणा छ । तर एमालेको आन्तरिक कलहले कस्तो रुप लिन्छ त्यो हेरेर मात्रै नेपाल पक्षले सरकारमा सहभागिताबारे निर्णय गर्ने भएकाले समस्या आएको उनको बुझाई हो ।