स्याङ्जामा ९० प्रतिशत धान रोपाई सम्पन्न

७ साउन, स्याङजा । साउन महिनाको दोस्रो हप्तामा प्रवेश गर्दा स्याङ्जामा ९० प्रतिशत भु—भागमा धान रोपाई सकिएकाे छ । स्याङ्जाका मकै खेतबाहेक सबैमा रोपाई सकिएको जिल्ला कृषि ज्ञान केन्द्रले जनाएको हो ।

समयमै बर्षा भएका कारण साउनको पहिलो हप्ता १० प्रतिशत भु—भागमा रोपाई गर्न बाँकी रहेको ज्ञान केन्द्रका प्रमुख विनोद हमालले बताए । उनका अनुसार चापाकोट र गल्याङ्तर्फका करिब ७ प्रतिशत भू–भाग र आँधीखोला, फेदीखोला र पुतलीबजारका करिब ३ प्रतिशत भू–भागमा मकै र चैते धान पाकी नसकेका कारण रोपाईं हुन बाँकी रहेको बताए ।

सिचाइँ पुगेका खेतमा जेठ महिनादेखि रोपाइँ सुरु भएको र अब एक हप्तामा जिल्लामा सबै भु—भागमा रोपाई सकिने हमालको भनाई छ ।

सिंचाईंका सुबिधा नपुगेका खेतमा पनि यसपटक नियमित आएको वर्षाले किसानलाई सहज बनाएको सुर्य अर्यालले बताए । स्याङ्जाका आँधीखोला किनार, कालीगण्डकी नदी किनार, ज्याग्दीखोला किनार, चापाकोट टार, रत्नपुर, कुवाकोट , गल्याङका क्षेत्र, सेतीदोभान फाँटहरु र बिरुवा फाँटहरु धानका उर्वर क्षेत्र हुन ।

यसैगरी, दहथुम, स्वरेक, खिलुङ, पुतलीबजार नगरपालिका वालिङ नगरपालिका, चापाकोट, रत्नपुर, मल्यांकोट, चिन्नेवास, सेतीदोभान, बिरुवा, बिर्घा, अर्जुनचौपारी, राङभाङ, तुलसीभन्ज्याङ, जगतभन्ज्याङ, गल्याङमा पनि धानको उत्पादन राम्रो हुन्छ । यसपटक जिल्लामा रामधान, सावित्री, सुनौलो सुगन्धा लगायतका उन्नत जात र हाइव्रीड धान रोपिएका छन् ।

अघिल्ला वर्षका तुलनामा यसबर्ष धान रोपाईंका क्षेत्र केही बढेको ज्ञान केन्द्रले दावी गरेको छ । कोरोनाका कारण घर फर्केका जनशक्ति अहिले कृषिमा जुटेका छन् । स्याङजामा गत बर्ष ५६ हजार मेट्रिक टन धान उत्पादन भएकोमा यसबर्ष ५८ देखि ५९ मेट्रिक टन उत्पादन बृद्धि हुने ज्ञान केन्द्रको अनुमान छ ।