चावहिलबाट चार जना चिकित्सक पक्राउ

१६ साउन,काठमाडौं । प्रहरीले चावहिलबाट चार चिकित्सकलाई पक्राउ गरेको छ । मेडिकल काउन्सिलको उजुरीमा प्रहरीले चावहिलबाट चार चिकित्सकलाई पक्राउ गरेको हो ।

काउन्सिलको स्वीकृती नै नलिइ अभ्यास गरेको भन्दै प्रहरीको केन्द्रीय अनुसन्धान ब्यूरो ‘सीआईबी’ले चाबहिलबाट उनीहरुलाई पक्राउ गरेको जनाएको छ ।

पक्राउ पर्नेमा चाबहिलको ओमकार डेन्टल होम प्रालिका सञ्चालक ४६ वर्षीय राधाकृष्ण तामाङ, सञ्चालक तथा चिकित्सक ४० वर्षीय डा. रावेद रन्जनकुमार ठाकुर, ३१ वर्षीय डा. सौरभ कुमार र कर्मचारी २७ वर्षीय सन्जु साह रहेको सीआईबीका डीआईजी धीरजप्रताप सिंहले पुष्टि गरेका छन् ।

उनले अहिले साँझ पक्राउ परेकाले विस्तृत अनुसन्धान हुन बाँकी रहेको बताए । यसअघि पनि प्रहरीले नक्कली प्रमाणपत्र पेश गरी अस्पतालमा कार्यरत चिकित्सकलाई पक्राउ गरेको थियो । डिआईजी सिंहले उनीहरुको छानवीनपछि विस्तृत विवरण सार्वजनिक गर्ने बताए ।