अमेरिकामा मान्छेको जस्तो दाँत भएको माछा फेला

२६ साउन, एजेन्सी । अमेरिकाको नोर्थ क्यारलाइनामा मान्छेको जस्तो दाँत भएको माछा फेला परेको बीबीसीले जनाएको छ ।

नोर्थ क्यारलाइनाको न्याग हेडमा माछा मार्न जाने मानिसहरूमाझ प्रख्यात जेनेट्स पीएरले आफ्नो फेसबुक पेजमा गत साता उक्त माछाको तस्बिर प्रकाशित गरेको हो ।

उक्त माछा शीप्सहेड जातको भएको समाचारमा बताइएको छ। आफ्नो सिकार चबाउन उक्त जातका माछाको मुखमा बङ्गाराका लहरहरू हुने समाचारमा उल्लेख गरिएकाे छ ।

उक्त माछाको मुख र भेडाको मुख झट्ट हेर्दा उस्तै देखिने भएकाले अङ्ग्रेजीमा उक्त माछालाई सम्भवतः ‘शीप्सहेड’ नामकरण गरिएको हो। जेनेट्स पीएरमा नियमित रूपमा माछा मार्न जाने नेथन मार्टिन नामक व्यक्तिले उक्त माछा समातेका हुन्।

मुखभरि दाँत भएको माछा देखेपछि आफूलाई पनि शीप्सहेड जातको माछा समात्न मन लागेको मार्टिनले बताए। स्थानीय मक्क्ल्याची न्यूजसँग कुरा गर्दै उनले उक्त माछा समात्न पाएकोमा प्रसन्नता व्यक्त गरेको बीबीसीले जनाएको छ। यो माछा निकै स्वादिलो हुने गर्छ ।