मुख्यमन्त्री पोखरेलले रोजे राजीनामाको बाटो

२७ साउन, काठमाडौं । लुम्बिनी प्रदेशका मुख्यमन्त्री शंकर पोखरेलले राजीनामाको विकल्प रोजेका छन् । प्रदेशसभामा अल्पमतमा परेपछि मुख्यमन्त्री पोखरेलले राजीनाकाे विकल्प रोजेका हुन् ।

चार महिनादेखि गिजोलिएको लुम्बिनीको सत्ता राजनीतिको छिनोफानोका लागि बुधबार प्रदेशसभाको बिशेष अधिवेशन बस्ने कार्यतालिका तय हुँदै गदा पोखरेलले राजीनामा दिने तयारी गरेकाे स्रोतले बताएको छ ।

मुख्यमन्त्री पोखरेलविरुद्ध अविश्वासको प्रस्ताव उपर छलफल गर्न आजै दिउँसो १ बजे प्रदेशसभाको बिशेष अधिवेशन बस्दै छ । अब परिस्थितिमा नाटकीय फेरबदल नभए माओवादी केन्द्रका संसदीय दलका नेता कुलप्रसाद केसी नयाँ मुख्यमन्त्री चयन हुन सक्ने सबैको चासोको बिषय बनेको छ ।

मुख्यमन्त्री पोखरेलविरुद्ध विपक्षी नेपाली कांग्रेस, नेकपा ‘माओवादी केन्द्र’, जनता समाजवादी पार्टी, नेपाल र राष्ट्रिय जनमोर्चाले साउन १९ गते तेस्रो पटक अविशवास प्रस्ताव दर्ता गराएका थिए ।

यसअघि मुख्यमन्त्री पोखरेल विरुद्ध विपक्षी गठबन्धनले वैशाख ६ र २६ गते पनि अविश्वासको प्रस्ताव दर्ता गरेका थिए । तर, ६ गते दर्ता गरेको अविश्वासको प्रस्तावमाथि छलफल हुने दिन वैशाख १९ गते मुख्यमन्त्रीबाट पोखरेलले राजीनामा दिएर एमालेको एकल बहुमत दाबी गर्दै सोही दिन पुनः मुख्यमन्त्रीमा नियुक्त भएका थिए ।

दोस्रो पटक मुख्यमन्त्रीमा पोखरेल नियुक्तिप्रति विपक्षीले असंवैधानिक भन्दै आएका छन्। विपक्षीका तर्फबाट नेकपा माओवादी केन्द्रका संसदीय दलका नेता केसीलाई मुख्यमन्त्रीका रुपमा ४२ सांसदहरुको हस्ताक्षर सहित दावी गरेका थिए। तर, पोखरेललाई नै नियुक्त गरेपछि विपक्षीहरुले सडक र सदनबाटै मुख्यमन्त्रीलाई अल्पमतको भन्दै विरोध गर्दै आएका थिए।

यसैबीच, सरकारलाई साथ दिएका तीन जनालाई जनता समाजवादी पार्टीले साउन १५ गते सांसद पद निलम्बन गरेपछि सरकार स्पष्ट अल्पमतमा परेको छ। सन्तोष कुमार पाण्डे, विजय बहादुर यादव र कल्पना पाण्डे लम्साल सर्वोच्च पुगेपनि अन्तरिम आदेश नदिएपछि पोखरेल सरकार थप संकटमा परेको हो। विपक्षीले अविश्वास प्रस्ताव बुधबार नै टुंग्याउने गरि तयारीमा जुटेका छन्।