बीपी कोइराला स्वास्थ्य विज्ञान प्रतिष्ठानमा अख्तियारको छापा

२८ साउन, काठमाडौं । बिगतदेखि नै विवाद र अनियमितताले चर्चा कमाएको धरानस्थित बीपी कोइराला स्वास्थ्य विज्ञान प्रतिष्ठानमा अख्तियार दुरुपयोग अनुसन्धान आयोगको टोलीले छापा मारेको छ ।

अख्तियारको केन्द्रीय कार्यालय र इटहरीस्थित कार्यालयको टोलीले आज बिहीबार संयूक्त रुपमा छापा मारेर महत्त्वपूर्ण कागजात नियन्त्रणमा लिँदै छानविन सुरु गरेको अख्तियारले जनाएको छ ।

डीएसपी टेकबहादुर तामाङसहित अख्तियारको केन्द्रीय कार्यालयबाट पाँच जना र इटहरी कार्यालयबाट एक गरी जम्मा ६ जनाको टोलीले प्रतिष्ठानमा छापा मारेको हो । छापा मार्ने क्रममा शंका लागेका दस्तावेजहरु नियन्त्रणमा लिने काम भईरहेको छ ।

स्वास्थ्य सामाग्रीको खरिद तथा निर्माणसँग सम्बन्धित विषयमा परेका दर्जनौं अनियमितताका उजुरी पछि अख्तियारले आज अचानक छापा मारेको हो ।

प्रतिष्ठानका उपकुलपति, रजिष्ट्रार लगायतले गरेका अनियमितता बारे पटक पटक आवाज उठने गरेको थियो । अख्तियारले यसअघि पनि उपकुलपतिसहितका दर्जनौं कर्मचारीहरुलाई पटकपटक रंगेहात पक्राउ गर्दै आएको थियो ।

जसका बारेमा अहिलेपनि विशेष अदालतमा मुद्धा चलिरहेको छ । प्रतिष्ठानकै प्राध्यापक, कर्मचारी तथा विद्यार्थीहरुले समेत यसबारे आवाज उठाउँदै विभिन्न चरणका आन्दोलन गर्दै आएका छन् ।