सानिमा लाइफको शेयर बाडँफाँड, ५ लाख ४० हजार भाग्यमानीले पाए १०/१० कित्ता

३० साउन, काठमाडौं । सानिमा लाइफ इन्स्योरेन्स लिमिटेडको प्राथमिक शेयर (आईपीओ) बाँडफाँड भएको छ । आईपीओमा आवेदन गर्ने पाँच लाख ४० हजार जनाले १०/१० कित्ताका दरले शेयर पाएका छन् भने एक लाख बढीको आवेदन रद्ध भएको छ ।

आज शनिबार कम्पनीको शेयर निष्काशन तथा बिक्री प्रबन्धक प्रभु क्यापिटलले आईपीओ बाँडफाँड गरेको हो । कम्पनीको आईपीओमा हालसम्मकै सर्वाधिक २४ लाख १९ हजार ८४८ जनाले आवेदन भरेका थिए ।

ती मध्ये पाँच हजार ४३४ जनाले दोहोरो आवेदन दिएका कारण र एक लाख ६ हजार २९२ जनाको अन्य कारणबाट आवेदन रद्ध भएको बिक्री प्रबन्धक प्रभु क्यापिटलले जनाएको छ।

प्रभु क्यापिट लिमिटेडले निष्काशन तथा बिक्री प्रबन्धक भई गत साउन २० गतेदेखि २४ गतेसम्म सार्वजनिक निष्काशन खुला गरिएको थियो ।सानिमाको आईपीओमा कूल ६० लाख कित्ता शेयर मध्ये सामुहिक लगानी कोषलाई ५ प्रतिशत बराबर ३ लाख कित्ता तथा कर्मचारीलाई ५ प्रतिशत बराबर ३ लाख कित्ता छुट्याई बाँकी रहेको ५४ लाख कित्ता शेयर सर्वसाधारणका लागि निष्काशन गरिएको थियो ।

कम्पनीको शेयर चौथो दिनसम्म ६.८४ गुणाले ओभर सब्सक्राइब भएको थियो । बाँडफाँडको नतिजा प्रभु क्यापिटलको वेवसाइट र तथा सीडीएससीको वेवसाइट https://iporesult.cdsc.com.np/ बाट हेर्न सकिने छ ।