नारायणी अस्पतालमा अख्तियारको छापा, विभिन्न कागजात नियन्त्रणमा

३२ साउन, काठमाडौं । नारायणी अस्पताल, वीरगञ्जमा अख्तियार दुरुपयोग अनुसन्धान आयोगले छापा मारेको छ । औषधी खरिदमा व्यापक अनियमितता भएको भनी उजुरी परेपछि सोमबार अख्तियारको हेटौंडा कार्यालयबाट खटिएको टोलीले छापा मारेको हो।

अख्तियारको हेटौंडा कार्यालयका प्रवक्ता विष्णु सापकोटाले नेपालबहस डटकमलाई दिएको जानकारी अनुसार अहिले औषधि पसल (फार्मेसी) मा खरिदविक्रीको रसिदहरु चेकजाँचको काम भइरहेको छ । प्रतिवेदन अनुसार औषधी पसलले विक्री गर्दै आइरहेका औषधी मिति पनि हेर्ने काम पनि अहिले जारी छ ।

प्रवक्ता सापकोटाका अनुसार अस्पतालको औषधि पसल (फार्मेसी) मा एक करोडभन्दा बढी हिनामिना भएको उजुरीका आधारमा अख्तियार, हेटौंडाको टोलीले आज औषधी पसलमा छापा मारेको हो ।

टोलीले अहिले औषधी खरिद लगायत अस्पतालका विभिन्न कागजात नियन्त्रणमा लिने काम गरिरहेको प्रवक्ता सापकोटाले नेपालबहस डटकमसँगकाे कुराकानीमा बताए ।