उच्च शेयरमूल्य भएको राष्ट्रिय बीमा कम्पनीको मुनाफा ४३ प्रतिशतले घट्यो

१ भदौ, काठमाडौं । शेयरबजारको दोस्रो बजार उच्च शेयरमूल्य उच्च रहेको राष्ट्रिय बीमा कम्पनीले गत आवको चौथो त्रैमासको वित्तीय विवरण मंगलवार सार्वजनिक गरेको छ ।

उक्त वित्तीय विवरण अनुसार कम्पनीको मुनाफा अघिल्लो आवको चौथो त्रैमासको तुलनामा गत आवको सोही अवधिमा ४३ प्रतिशतले कमी आएको छ ।

कम्पनीले अघिल्लो आवमा ६३ करोड ८५ लाख ६ हजार मुनाफा आर्जन गरेकोमा गत आवमा ३६ करोड ३ लाख २८ हजारमा सीमित भएको हो ।

गत आवमा कम्पनीको आम्दानीमा कमी आएको नाफा घटेको हो । अघिल्लो आवको तुलनामा गत आवमा कम्पनीको आम्दानी ३५ प्रतिशतले कमी आएको छ । त्यसैगरी कम्पनीको जगेडामा  ३ अर्ब १४ करोड ८५ लाख र बीमा कोषमा २ अर्ब ४३ करोड १ लाख सञ्चित गरेको हो ।

कम्पनीले गत आवमा १ अर्ब ६३ करोड ६० लाख ९९ हजार बीमाशुल्क आर्जन गरेको छ । अघिल्लो आवको तुलनामा गत आवमा बीमाशुल्क २६ प्रतिशतले वृद्धि भएको हो । त्यसैगरी कम्पनीले गत आवसम्ममा ९ हजार ६७९ जनालाई १५ करोड १८ लाख ५२ हजार दाबी भुक्तानी गरेको छ भने नविकरण गरिएको बीमालेखको संख्या ८ हजार ५२५ रहेको छ ।

त्यस्तै, कम्पनीको प्रतिशेयर आम्दानी १३५ दशमलव १४, मूल्य आम्दानी अनुपात १५९ दशमलव ८४ र तरलता अनुपात ३ दशमलव ४६ र प्रतिशेयर नेटवर्थ १ हजार २८० दशमलव ८१ रहेको छ । यो समचार तयार पर्दासम्म कम्पनीको शेयमूल्य प्रतिकित्ता २० हजार ५०० कारोबार भइरहेको छ ।