वालिङमा हरियाली पुनःउत्थान परियोजना: फाेहोरमैलालाई स्रोतको रुपमा प्रयोग गरिने

४ भदौ, वालिङ । स्याङ्जाको वालिङ नगरपालिकामा हरित पुनःउत्थान प्रबद्धर्न परियोजना (पीजीआरपी) सुरु भएको छ । नगरलाई सफा सुन्दर बनाउनका साथै रोजगारी सिर्जना गर्ने तथा उत्पादन बृद्धि गर्ने लक्ष्यसहित परियोजना सुरु गरिएको बताईएको छ ।

संयुक्त राष्ट्रसंघीय बिकास कार्यक्रम (युएनडिपी) र वालिङ नगरपालिकाको साझेदारी तथा वालिङ प्रोडक्ट होल्डिङ बहुउद्देश्यीय सहकारी संस्थाको व्यवस्थापनमा परियोजना शुरु भएको हो ।

कार्यक्रममा बोल्दै वालिङ नगरपालिकाका प्रमुख दीलिपप्रताप खाँणले फोहरलाई श्रोतका रुपमा प्रयोग गरी रोजगारी सिर्जना गरिने बताए ।उनले भने, फाहोरको सम्बन्धमा नागरिकको सोच परिवर्तन गर्न सकेमा सहजै रोजगारी सिर्जना गर्न सकिन्छ । स्मार्ट सिटीको अवधारणामा अगाडि बढेको नगरलाई बिभिन्न दातृ निकायबाट सहयोग लिईएर योजना अगाडि बढाईएको जानकारी उनले दिए ।

कार्यक्रममा बोल्दै युएनडिपी नेपालका लुम्बिनी र गण्डकी प्रदेश प्रमुख सुदिप अर्याल दीगो बिकास लक्ष्य प्राप्तिका लागि हरित पुनःउत्थान परियोजनाले सहयोग पुर्याउने बताए । उनले भने ‘वालिङको सोच र योजनामा युएनडिपीको सहकार्य निक्कै उपलव्धिमूलक रहेको छ’ ।

वालिङ नगरपालिकाले लिएको उत्पादन र उत्पादकत्व बढाउने योजनालाई युएनडिपीले सहजीकरण गरिरहेको अर्यालले बताए । परियोजनाले नीतिगत र कार्यान्वयन तहमा फोहरमैला व्यवस्थापनका लागि सहयोग गर्ने तथा स्वरोजगारी सिर्जना गर्न सहयोग पुर्याउने अर्यालको भनाई छ । परियोजनाले बिशेष गरी महिलाहरुलाई स्वरोजगार बनाउने लक्ष्य राखेको उनको जानकारी दिए ।

अभिमुखिकरण कार्यक्रममा युएनडिपीका शहरी फोहोरमैला व्यवस्थापन विज्ञ सन्तोष दास श्रेष्ठले फोहरबाट रोजगारी सिर्जना गर्ने र परियोजनाले दीर्घकालिन योजना निर्माण गर्ने समेत उनको भनाई छ । फोहोरमैला व्यवस्थापन तथा न्युनीकरणका लागि परियोजना काम गर्ने बताउँदै उनले भने, परियोजनामार्फत दिर्घकालिन सरसफाई पद्धतिको विकास गरिने छ ।

कार्यक्रममा नगरपालिकाको तर्फबाट ईन्जिनियर दीपेन्द्र मल्लले प्रस्तुती गरेका थिए । कार्यक्रममा वालिङ प्रोडक्ट होल्डिङ बहुउद्देश्यीय सहकारी संस्थाका अध्यक्ष ल्याप्टेन याम बहादुर गुरुङ, दियालो संस्थाका अध्यक्ष कविता तिवारी लगायतले बोलेका थिए । कार्यक्रमको सञ्चालन वालिङ नगरपालिका माधव प्रसाद न्यौपानेले गरेका थिए ।

परियोजनाको अवधिमा अर्गानिक खेती, फोहरमैलाबाट रोजगारी सिर्जना १४ वटै वडामा उत्पादन भएक बस्तुलाई बजारसम्म लैजाने र उद्यमी गर्न चाहानेलाई ईबिकमार्फत व्यवसायिक योजना बनाई उद्यमशीलतामा अगाडि बढाउने योजना रहेको परियोजना प्रमुख बिशाल बगालेले जानकारी दिए ।