बर्दियाबाट बुलेट मोटरसाइकलसहित लागुऔषध कारोबारी पक्राउ

८ भदौ, बर्दिया ‘गुलरिया’ । लागुऔषध ब्राउन सुगरसहित एक कारोबारीलाई प्रहरीले पक्राउ गरेको छ । विशेष सूचनाको आधारमा नेपालगंजबाट लागू औषध ब्यूरो र बर्दिया प्रहरीको संयुक्त टोलीले गुलरिया बजार सहिद पार्क नजिकैबाट बा ८५ प ९८२८ नम्वरको बुलेट मोटरसाइकलसहित गुलरिया नगरपालिका–२ खैरापुरका ३५ वर्षीय अकलेश यादवलाई प्रहरीले पक्राउ गरेको जिल्ला प्रहरी कार्यालय बर्दियाले जनाएको छ।

शंकास्पद रुपमा बिगत देखि निगरानीमा रहेका यादवको मोटरसाईकल रोकी प्रहरीले खानतलासी गर्दा लागु औषध बरामद भएको प्रहरीले बताएको छ ।

प्रहरीले खानतलासी गर्दा यादवको साथबाट ३० वटा साना–साना पुरिया बनाई राखेको लागु औषध ब्राउन सुगर प्रहरीले फेला पारेको हो ।

उनको साथबाट २७ ग्राम ५ सय मिलिग्राम ब्राउन सुगर र एक मोबाईल समेत फेला परेको प्रहरीले जानकारी दिएको छ । प्रारम्भिक अनुसन्धानबाट पक्राउ परेका यादव लागु औषधको कारोबारी रहेको खुल्न आएको जिल्ला प्रहरी कार्यालय बर्दियाका डिएसपी हेम बहादुर शाहीले बताए । यादवलाई नियन्त्रणमा लिई थप अनुसन्धान भईरहेको शाहिले जानकारी दिए ।