सुनील सेठ्ठीका छोरा आहानको डेब्यु फिल्म ‘तडप’ को ट्रेलर सार्वजनिक

१० कात्तिक, काठमाडौं । बलिउड अभिनेता सुनील सेठ्ठीका छोरा आहान सेठ्ठीको डेब्यु फिल्म ‘तडप’ को ट्रेलर बुधबार सार्वजनिक गरिएको छ । पौने तीन मिनेट लामो ट्रेलरमा आहान एक्सनका साथै लभर ब्वाईका रूपमा प्रस्तुत भएका छन् ।

३ डिसेम्बरमा प्रदर्शन हुने फिल्मको मंगलबार टिजर सार्वजनिक गरिएको थियो । टिजरमा आहानलाई पछाडि मात्रै देखाएको छ । त्यसले दर्शकमा कुतुहलता पैदा गर्न पुग्यो ।

मिलन लुथरिया निर्देशित फिल्ममा आहानको जोडी तारा सुतरिया छिन् । भारतको उत्तराखण्ड, मसुरिका युवा इशान (आहान) र बिदेशबाट आएकी रमीशा (तारा) बीचको प्रेमकथालाई प्रस्तुत गरिएको बताइने फिल्मको ट्रेलरले दर्शकको उत्साहजनक प्रतिक्रिया पाइरहेको छ ।