मुस्ताङ हिमपहिरो : भागदौड हुँदा ११ जना घाइते

२८ कार्तिक, काठमाडौं । मुस्ताङको कोबाङ क्षेत्रमा हिमपहिरोको डरले भागदौड हुँदा ११ जना घाइते भएका छन् ।आइतबार दिउँसो मानापाथी हिमालबाट ठूलो हिमपहिरो खसेपछि हिमपहिरोको डरले भागदौड हुँदा ११ जना घाइते भएका हुन् ।

हिमपहिरो खसेपछि भागदौड हुँदा मानापाथी हिमालको फेदी थासाङ गाउँपालिका– २ को जनआदर्श माविका शिक्षक र विद्यार्थी घाइते भएका प्रहरीले जनाएको छ ।

हिमपहिरो खसेपछि त्यसको असरबाट जोगिन भागदौड हुँदा ११ जना सामान्य घाइते भएका र उनीहरुलाई जिल्ला अस्पताल लगिएको छ ।

घटनालगतै घटनास्थलमा पुगेका प्रमुख जिल्ला अधिकारी नेत्रप्रसाद शर्माले नेपालबहस डटकमसँग कुराकानी गर्दै हिमपहिरोबाट मानवीय अन्य क्षति भने नभएको बताएका छन् ।

प्रमुख जिल्ला अधिकारी शर्माका अनुसार प्रहरी घटनास्थल पुगिसकेको छ। उनकाअनुसार हिउँ पहिरो गएको क्षेत्र चरन क्षेत्र हो। यहाँ चौरीलगायत केही हिउँ पहिरोमा परेको हुनसक्ने अनुमान रहेको नेपालबहस डटकमलाई जानकारी दिए । हिमपहिरोकाे छिटाले किसानले सुकाएको फापरमा समेत असर परेको छ ।