कांग्रेस बागमती प्रदेशको मतदान सुरु

१८ मंसिर, मकवानपुर । नेपाली कांग्रेसको १४ औँ महाधिवेशन अन्तर्गत बागमती प्रदेश अधिवेशनमा मतदान आज अपराह्न ४ बजे सुरु भएको छ । हेटौँडा उपमहानगरपालिका–१० स्थित वन विज्ञान अध्ययन संस्थानको खेलमैदानमा मतदान सुरु भएको हो ।
निर्धारित समयभन्दा ६ घण्टा ढिलो गरी नेपाली कांग्रेसको १४ औँ महाधिवेशन अन्तर्गत बागमती प्रदेश अधिवेशनको मतदान सुरु भएको छ । निर्वाचनको कार्यतालिका अनुरूप बिहान १० बजेबाट हुनुपर्नेमा मतदान अन्तिम उम्मेदवारी नामावली र मतपत्र छपाइमा ढिला हुँदा मतदान निर्धारित समयभन्दा ढिला गरी सुरु भएको हो । सभापतिका उम्मेदवार इन्द्रबहादुर बानियाँले निर्वाचन सुरु भएको एक घण्टापछि मतदान गरेका थिए ।

त्यस्तै सभापति पदका उम्मेदवार जगदीश्वरनरसिंह केसी र भीमसेनदास प्रधान पनि मतदानस्थलमा पुगेर मतदान गरेका थिए।
निर्वाचन समितिका संयोजक अधिवक्ता केशवप्रसाद काफ्लेका अनुसार रातिको १० बजेसम्म मतदान कार्यक्रम सञ्चालन हुनेछ । प्रदेश सभापतिमा इन्द्रबहादुर बानियाँ, भीमसेनदास प्रधान र जगदीश्वरनरसिंह केसीको उम्मेदवारी परेको छ । उनीहरूको प्यानल घोषणा सँगै चुनावी मैदानमा रहेका छन् । मतदान चाँडै सम्पन्न गर्न १० वटा केन्द्रको स्थापना गरिएको छ । कम मतदाता भएका तीन जिल्लाका लागि एउटा, काठमाडौंंका लागि तीन र अन्य जिल्लाका लागि एक-एक मतदान केन्द्र स्थापना गरिएको हो ।

प्रदेश अधिवेशनले एक सभापति, दुई उप–सभापति, दुई महामन्त्री र एक महिलासहित तीन सह–महामन्त्री, सदस्यहरूमा प्रत्येक जिल्ला २ जनाको दरले २६ जना, प्रदेशसभाको कुल निर्वाचन क्षेत्रबाट २२ जना, खस आर्यबाट १२ जना, आदिवासी जनजातितर्फबाट १७ जना, मधेसीबाट १ जना, दलितबाट २ जना, थारुबाट १ जना, मुस्लिमबाट १ जना र अल्पसङ्ख्यक वा अपाङ्गतामध्येबाट १ जना गरी ९१ जनाको प्रदेश समिति निर्वाचित गर्नेछ । बागमती प्रदेशमा केन्द्रीय महाधिवेशन प्रतिनिधि १ सय २४५ जना, प्रदेश प्रतिनिधि ८६७ जना र केन्द्रीय सदस्य १६ जना गरी दुई हजार १३७ जना मतदाता रहेका छन् ।

मतदानस्थल वरपर टाँसिएका उम्मेदवारका प्रचार सामग्री हटाइएको छ । अधिवेशनमा एक हजार २४५ केन्द्रीय महाधिवेशन प्रतिनिधि, ८७६ प्रदेश प्रतिनिधि र १६ केन्द्रीय सदस्य गरी जम्मा दुई हजार १३७ जनाले नयाँ नेतृत्व चयनका लागि सहभागिता जनाउँदै छन् ।