नेकपा माओवादी सहमति नभएपछि प्रदेश १ को अधिवेशन लम्बियो

२७ मंसिर, विराटनगर । नेकपा माओवादी केन्द्र प्रदेश १ को अधिवेशन लम्बिएको छ । अध्यक्ष र पदाधिकारी कसलाई बनाउने भन्नेबारे सहमति जुट्न नसकेपछि अधिवेशन लम्बिएको हो ।

नयाँ नेतृत्वका लागि २६९ सदस्यीय कमिटी बनाउने सहमति जुटे पनि नयाँ नेतृत्वमा पदाधिकारीका लागि आकांक्षी धेरै भएपछि अधिवेशन लम्बिएको हो ।

शनिबार सुरु भएको प्रदेश सम्मेलनले आइतबार नेतृत्व चयन गर्ने कार्यतालिका थियो । तर, नेतृत्वका आकांक्षी धेरै भएर सहमति हुन नसक्दा अधिवेशन लम्बिन पुगेको हो ।

आइतबार रातिसम्म नेतृत्व छनोट गर्नेगरी निर्वाचनको कार्यसूची प्रकाशित भएको थियो । तर, सहमतिको प्रयास गर्ने भन्दै नेताहरू छलफलमा बसेपछि कार्यसूची प्रभावित भएको निर्वाचन समितिले जनाएको छ । प्रदेश अध्यक्षको दौडमा सुरेशकुमार राई (हिमाल), हेमराज भण्डारी, ईन्द्रबहादुर आङ्बो र सुदन किराती दौडमा छन् । प्रदेशमा चुनिएका २६९ जना सदस्यले अध्यक्षसहित पदाधिकारी छान्ने नेताहरुले बताएका छन् । अधिवेशनमा प्रदेशभरिका प्रतिनिधि र पर्यवेक्षक गरी झण्डै १५ सय सहभागी छन् ।

प्रदेश अधिवेशनले पार्टीको विधानअनुसार अध्यक्ष एक, उपाध्यक्ष महिलासहित तीन, सचिव एक, सहसचिव तीन र कोषाध्यक्षसहितको प्रदेश समिति निर्वाचित गर्नेछ । सदस्य पदमा सहमति भइसकेका सदस्यहरुको नाम सोमबार सार्वजनिक गर्ने पार्टी केन्द्रीय सदस्य इन्द्र आङ्बो मौसमले जानकारी दिए ।