नेप्सेमा सूचीकृत डेढ दर्जन बीमा कम्पनीद्वारा लाभांश घोषणा, कुनको कति ?

२० फागुन, काठमाडौं । नेप्सेमा सूचीकृत डेढ दर्जन बीमा कम्पनीले लाभांश घोषणा गरेका छन् । हाल ११ निर्जीवन बीमा कम्पनी र ८ जीवन बीमा कम्पनीले गत वर्षको मुनाफाबाट लाभांश घोषणा गरेका हुन् ।

निर्जिवन बीमा कम्पनी

हालसम्म निर्जिवन बीमा कम्पनीले लाभांश घोषणा गरेका छन् । यतिबेला सगरमाथा इन्स्योरेन्स, नेको इन्स्योरेन्स, सिद्धार्थ इन्स्योरेन्स, प्रिमियर इन्स्योरेन्स, प्रभु इन्स्योरेन्स, एनएलजी इन्स्योरेन्स, लुम्बिनी जनरल इन्स्योरेन्स, आइएमई जनरल इन्स्योरेन्स, प्रुडेन्सियल इन्स्योरेन्स, हिमालयन जनरल इन्स्योरेन्स र एभरेष्ट इन्स्योरेन्सले लाभांश घोषणा गरेका छन् ।

११ निर्जीवन बीमा कम्पनीहरुमा प्रिमियर इन्स्योरेन्सले साधारण सभा बोलाएर प्रस्तावित लाभांश पारित गरिसकेको छ । कम्पनीले वार्षिक साधारणबाट १४.२५ प्रतिशत बोनस शेयर र बोनस शेयरमा लाग्ने कर प्रयोजनका लागि ०.७५ प्रतिशत नगद गरी १५ प्रतिशत लाभांश वितरण गर्ने प्रस्ताव पारित गरिसकेको छ ।

हिमालयन जनरल इन्स्योरेन्सले लाभांश पारित गर्न फागुन ३० गते साधारणसभा बोलाएको छ । साधारण सभा तथा लाभांश प्रयोजनका लागि कम्पनीले फागुन १६ गते बुक क्लोज गरेको छ ।

त्यस्तै, नेको इन्स्योरेन्सले पनि १५ प्रतिशत लाभांश पारित गर्न चैत ९ गते, बुधबार २६औं वार्षिक साधारणसभा बोलाएको छ । लाभांश प्रस्ताव गरेका अन्य कम्पनीले भने साधारणसभाको मिति तय गरेका छैनन् ।

यस्तै, नयाँ निर्जीवन बीमा कम्पनी अजोड इन्स्योरेन्स र सानिमा जनरल इन्स्योरेन्सले भने गत आवको मुनाफाबाट पनि लगानीकर्ताका लागि लाभांश वितरण गर्न सकेनन् । यी दुई वटै कम्पनीले गत आवको वार्षिक साधारणसभा सम्पन्न गरिसकेका छन् ।

जीवन बीमा कम्पनी

नेप्सेमा सूचीकृते आठ कम्पनीहरुले लाभांश घोषणा गरेका छन् । हाल सूर्या लाइफ, प्राइम लाइफ, ज्योति लाइफ, रिलायन्स लाइफ इन्स्योरेन्स, नेपाल इन्स्योरेन्स, एशियन लाइफ, नेशनल लाइफ र एलआइसी नेपालले लाभांश प्रस्ताव गरेका हुन् ।

लाभांश घोषणा गरेका जीवन बीमा कम्पनीमध्ये ६ कम्पनीले साधारण सभा सम्पन्न गरि प्रस्तावित लाभांश समेत पारित गरेका छन् । एशियन, सूर्या, प्राइम, ज्योती, रिलायन्स र एलआइसी नेपालको लाभांश साधारण सभाबाट पारित भएको हो ।

नेशनल लाइफले साधारणसभाको मिति तोकी लाभांश प्रयोजनको लागि बुक क्लोजको मिति समेत तोकेको छ भने नेपाल लाइफले साधारणसभाको मिति तय गरेको छैन ।

त्यस्तै, प्राइम लाइफ इन्स्योरेन्सले १५ प्रतिशत बोनस शेयर र ०.८७ प्रतिशत नगद गरी कुल १५.८७ प्रतिशत, सूर्या लाइफले १२।७ प्रतिशत बोनस शेयर र कर प्रयोजनका लागि ०.६६ प्रतिशत नगद लाभांश, ज्योति लाइफ इन्स्योरेन्स कम्पनीले १०.५२ प्रतिशत, रिलायन्स लाइफ इन्स्योरेन्सले ५.२६ प्रतिशत नगद लाभांश, एलआइसी नेपालले प्रस्ताव गरेको २१.०५ प्रतिशत र नेशनल लाइफ इन्स्योरेन्सले २० प्रतिशत लाभांश घोषण गरेको हो । यी कम्पनीको सभाले लाभांश समेत पारित गरिसकेका छन् ।

नेपाल लाइफले अघिल्लो आवको मुनाफाबाट लागानीकर्ताका लागि १४.७३ प्रतिशत लाभांश दिने प्रस्ताव गरेको छ । नेप्सेमा सूचीकृत जीवन बीमा कम्पनीमध्ये गुराँस लाइफ, यूनियन लाइफ र सानिमा लाइफले लगानीकर्ताका लागि लाभांश प्रस्ताव गर्न बाँकी छ ।