आन्दोलनरत विद्यार्थीलाई पढाइमा फर्कन नोबेलको आग्रह

२६ फागुन, काठमाडौं ।  विराटनगरस्थित नोबेल मेडिकल कलेजले आन्दोलनरत विद्यार्थीलाई पढाइमा फर्कन आग्रह गरेको छ । एमबिबिएस प्रथम वर्षमा पढाइबाट वञ्चित भएका सबै विद्यार्थीलाई पढाइमा सहभागी हुन नोबेल मेडिकल कलेजले आग्रह गरेको हो ।

नोबेल मेडिकल कलेज शिक्षण अस्पतालका प्रा.डा.रामहरि घिमिरेले बिहीबार विज्ञप्ति जारी गर्दै पढाइमा सहभागी हुन आग्रह गरेका हुन् । चिकित्सा शिक्षा आयोगले तोकेभन्दा बढी शुल्क विद्यार्थीबाट नलिएको उल्लेख गर्दै कलेजले कुनै पनि विद्यार्थीप्रति पूर्वाग्रह नराखेको विज्ञप्तिमा उल्लेख छ ।

एमबिबिएस १५औँ ब्याचमा भर्ना भएका ११० विद्यार्थीमध्ये १० जना अझै असुरक्षा भएको भन्दै पढाइमा सहभागी भएका छैनन् ।

उनीहरु अहिले पनि अन्दोलनरत छन् । १५औँ ब्याचको भर्ना प्रक्रिया पूरा गरेर एमबिबिएस अध्ययन गर्नुपर्ने केही विद्यार्थीले कलेजबारे कपोलकल्पित र भ्रामक कुरा उल्लेख गरी सञ्चारमाध्यमबाट अफवाह फैलाएको कलेजको आरोप छ ।

कलेजले आयोगले तोकेको शीर्षकहरूमा भन्दा कुनै बढी शुल्क नलिएको प्रा.डा. घिमिरेले बताएका छन् । नोबेल मेडिकल कलेज, आयोग, काठमाडौं विश्वविद्यालय र शिक्षा मन्त्रालयबीच ३० पुस ०७८ मा भएको लिखित सहमतिलाई अक्षरशः पालना गर्ने पनि कलेजले प्रतिबद्धता जनाएको छ ।

आयोग र सरकारले अतिरिक्त शुल्क कानुनविपरीत भएको भन्दै नलिन निर्देशन गरे पनि नोबेलले अटेर गर्दै आएको विद्यार्थीको आरोप छ । प्रतिनिधि सभाको शिक्षा तथा स्वास्थ्य समितिले पनि नोबेल मेडिकल कलेजले अतिरिक्त शुल्क नहटाए कारवाही गर्न सरकारलाई निर्देशन दिएको थियो ।