अध्यक्ष नेपालको राजनीतिक प्रतिवेदन सुझावसहित पारित

२६ फागुन, काठमाडौं ।  नेकपा (एकीकृत समाजवादी) को केन्द्रीय कमिटी बैठकमा अध्यक्ष माधवकुमार नेपालले प्रस्तुत गरेको राजनीतिक प्रतिवेदन सुझावसहित पारित भएको छ । बिहीबार सम्पन्न दुई दिने केन्द्रीय समिति बैठकले राजनीतिक प्रतिवेदन सुझावसहित पारित भएको हो ।

पारित प्रतिवेदनमा वर्तमान अन्तर्राष्ट्रिय परिस्थिति र राष्ट्रिय राजनीतिक परिस्थितिको विश्लेषण, एमसीसी र व्याख्यात्मक घोषणाको चर्चा, पार्टी पुनर्गठनदेखि हालसम्मको संगठनात्मक कामको समीक्षा र आगामी कार्ययोजना लगायतका विषय समावेश छन् ।

प्रतिवेदनमाथि नौ समूहमा विभाजित केन्द्रीय सदस्यहरूले समूहगत छलफल गरेका थिए । समूह नेताले बिहीबारको बैठकमा सुझाव पेश गरेपछि अध्यक्ष नेपालले उठेका प्रश्नको जवाफ दिएका थिए । बैठकले संगठन संचालन निर्देशिका र सम्पर्क मञ्च सञ्चालन निर्देशिका पनि सुझावसहित पारित गरेको छ ।