आगामी वर्ष ५२ शनिबारबाहेक ४३ दिन सार्वजनिक बिदा

२७ फागुन, काठमाडौं ।  सरकारले आगामी वर्ष शनिबारबाहेक ४३ दिन बिदा दिने निर्णय गरेको छ । गृह मन्त्रालयका अनुसार आगामी वर्षभरिमा विभिन्न चाडपर्वका लागि २० दिन, महिला कर्मचारीका लागि दुई दिन, शिक्षण संस्थाका लागि एक दिन बिदा दिइने छ ।

काठमाडौँ उपत्यकाका लागि चार दिन, दशैँ बिदा छ दिन, तिहार बिदा पाँच दिन र सबैले पाउने दिवस बिदा पाँच दिन परेका छन् । त्यसैगरी, अपाङ्गता भएका व्यक्तिका लागि एक दिन र विभिन्न जन्मजयन्तीका लागि तीन दिन बिदा दिइएको छ ।

मन्त्रालयका अनुसार आगामी वर्ष २०७९ मा सार्वजनिक र शनिबार गरी जम्मा ९५ दिन बिदा हुनेछ । आगामी वर्ष सार्वजनिक बिदाबाहेक ५२ वटा शनिबार परेका छन् ।

नेपाल सरकारले तोकेका सार्वजनिक बिदाबाहेक विभिन्न प्रदेश सरकारले प्रदेशको धर्म, संस्कृतिअनुसार बढीमा ६ दिनसम्मको सार्वजनिक बिदामा सम्बन्धित प्रदेशमा रहेका सङ्घीय कार्यालयमा समेत सार्वजनिक बिदा गरिनेछ ।

आगामी वर्ष वैशाख १ गतेदेखि चैत मसान्तसम्म एक वर्षभरिमा सबै सरकारी कार्यालय तथा सार्वजनिक निकायका लागि शनिबारबाहेक ४३ दिन बिदा दिने निर्णय भएको हो । शनिबारकै दिन परेकाले दिवस रपर्वलाई पनि छुट्टै बिदामा जोडिएको छैन ।

यता, नेपाल पञ्चाङ्ग निर्णायक समितिका अनुसार आगामी वर्ष २०७९ को चाडपर्व सहितको पात्रो तयार भएकोे जनाएको छ । विभिन्न १४ वटा पात्रोलाई तिथिमिति सहितको विवरण उपलब्ध गराएर बजारमा ल्याउन अनुमति दिएको छ ।

२०७९ सालको दशैंको टीका असोज १९ गते परेको छ । यसैगरी, भदौ २६ गतेबाट असोज ९ गतेसम्म सोह्र श्राद्ध, असोज १० गते घटस्थापना, १६ गते फूलपाती, १७ गते महाष्टमी, १८ गते महानवमी र असोज १९ गते विजयादशमी परेको छ ।

समितिले तयार पारेको पात्रो अनुसार कात्तिक १० गते भाइटीका परेको छ । कात्तिक ६ गते कागतिहार, ७ गते कुकुरतिहार र लक्ष्मीपूजा परेको छ । कात्तिक ८ गते गाईपूजा छ । कात्तिक ९ गते गोबर्द्धन, म्ह पूजा परेको छ ।

समितिका अनुसार २०७८ सालमा विवाहका ५६ वटा लगन जुरेको छन् । त्यस्तै, आगामी वर्ष व्रतबन्धको लगन पनि धेरै रहेका छन् ।

समितिले बजारमा प्रकाशित भएका नक्कली पात्रोहरुले भ्रम छर्ने काम गरेको भन्दै त्यसमा लेखिएका तिथि र पर्वलाई आधिकारिक नमान्न आग्रह गरेको छ ।