कांग्रेसको एकमहिने अभियानपछि मात्रै तालमेलको निर्णय हुन्छः प्रकाशमान

२७ फागुन, काठमाडौं ।  नेपाली कांग्रेसका नेता प्रकाशमान सिंहले चुनावी तालमेलका बारेमा अहिले धारणा बनाउन नहुने बताएका छन् । उनले चुनावी तालमेलका सम्बन्धमा कांग्रेसभित्रै विभिन्न किसिमका धारणा रहेको र ति सवै व्यक्तिगत धारणा भएको बताए ।

काठमाडौंको आलोक नगरमा शुक्रबार बिहान आयोजित बुथ समिति गठन कार्यक्रमलाई सम्बोधन गर्दै उनले एक महिने अभियानबाट फर्केर रिपोर्ट ल्याएपछि आवश्यक निर्णय गर्ने उनले बताए ।

सिंहले कांग्रेसले सुरु गरेको ‘घरघर जाऔं, नेपाली कांग्रेसलाई जिताऔं अभियानबाट रिपोर्ट आएपछि मात्रै केन्द्रीय समितिले जे गर्दा राम्रो हुन्छ त्यो निर्णय गर्ने बताए ।

एक महिने चुनावी अभियानपछि मात्रै तालमेल गर्ने कि नगर्ने भन्नेबारेमा पार्टीले निर्णय गर्ने बताउँदै उनले अहिले गठबन्धनमा रहेका दलहरुका सम्बन्धमा भन्दा कांग्रेसले आफ्ना एजेण्डालाई जनतामाझ पुर्याउन पर्ने बताए ।