उमेशप्रसाद थानी निगमको कार्यकारी निर्देशकमा नियुक्त

२७ फागुल, काठमाडौं ।  सरकारले नेपाल आयल निगमको कार्यकारी निर्देशकमा उमेशप्रसाद थानीलाई नियुक्त गरेको छ । बिहीबारको मन्त्री परिषदको बैठकले सिफरिस गरिएका तिनमध्ये थानीलाई नियुक्त गरेको हो ।

निगमको कार्यकारी निर्देशक नियुक्तिका लागि गठन भएको सिफारिस समितिले गोरखाका चण्डिकाप्रसाद भट्ट, तेह्रथुमका जीवनप्रसाद सिटौला र सुर्खेतका उमेशप्रसाद थानीको नाम पठाएको थियो ।

बिहीबार बसेको मन्त्रिपरिषदको बैठकले कांग्रेसनिकट इन्जिनियर थानीलाई निगमको कार्यकारी निर्देशकमा नियुक्त गरेको हो । उद्योग वाणिज्य तथा आपूर्ति मन्त्रालय समेत सम्हालेका प्रधानमन्त्री शेरबहादुर देउवानिकट थानीलाई नियुक्त गरिएपछि देउवालाई सहज हुने बताइएको छ ।

सुर्खेतका थानी कांग्रेसनिकट इन्जिनियरहरूको संस्था सेन्टर फर डेमोक्रेटिक इन्जिनियर्स नेपालका अध्यक्ष हुन् । सुरेन्द्र पौडेलको कार्यकाल सकिएसँगै निगमको कार्यकारी निर्देशक पद रिक्त थियो । गत पुसमा मन्त्रालयले निर्देशक पदमा खुला प्रतिस्पर्धाबाट दरखास्त आह्वान गरेको थियो ।

कार्यकारी निर्देशक हुनका लागि निगमको कार्यप्रकृतिसँग सम्बन्धित विषय वा प्रशासन, व्यवस्थापन, अर्थशास्त्र, इञ्जिनियरिङ वा कानुन विषयमा कम्तिमा स्नातकोत्तर तह उत्तीर्ण गरेको हुनुपर्ने, व्यवस्थापकीय जिम्मेवारीको पदमा कम्तीमा ५ वर्षको अनुभव भएको हुनुपर्ने योग्यता तोकिएको छ । थानी विद्युत प्राधिकरण र सडक बोर्डमा राजनीति नियुक्ती समेत खाइसकेका व्यक्ति हुन् ।