लुम्बिनीमा उम्मेदवारको योग्यता र मापदण्डसहित चुनावी अभियान सुरु

२७ फागुन, बुटवल । नेपाली कांग्रेसले लुम्बिनी प्रदेशमा उम्मेदवारको योग्यता र मापदण्डसहित स्थानीय तहको चुनावी प्रचार सुरु गरेको छ ।

कांग्रेस नेता तथा गृहमन्त्री बालकृष्ण खाँडका अनुसार लुम्बिनी प्रदेशका सवै जिल्लामा चुनावी अभियानका लागि सो क्षेत्रका सवै नेता तथा कार्यकताहरु जुटेको बताए ।

उनले कांग्रेसका प्रदेश समिति र जिल्ला समितिहरुले जनतामाझ पुगेर चुनावी अभियान सुरु गरेको कांग्रेका आगामी उम्मेदवारहरुका विषयमा पनि जानकारी गराउन थालेको बताए ।

मन्त्री खाँडका अनुसार प्रदेश समितिले प्रदेशका १२ वटा जिल्लामा प्रतिनिधि खटाएर चुनावी अभियान थालेको छ ।
कांग्रेस लुम्बिनी प्रदेश सभापति अमरसिंह पुनलगायतका नेताहरुले कांग्रेसले ‘घरघर जाऔं, कांग्रेस जिताऔ’ भन्ने अभियान गाउँ–टोलसम्म पु¥याउन सवै मापदण्डहरु तयार गरेको र गाउँगाउँ पठाएको स्थानीय नेताहरुले बताएका छन् ।

नेताहरुले दिएको जानकारी अनुसार स्थानीय तहको निर्वाचन अभियानसंगै कांग्रेस लुम्बिनीले स्थानीय तहमा उठ्ने उम्मेदवारहरुको मापदण्ड र योग्यता समेत तय गरेको छ ।

कांग्रेस लुम्बिनी प्रदेश समितिको बुटवलमा बसेको बैठकले आगामी बैशाख ३० गते घोषणा गरिएको स्थानीय तहको निर्वाचनका लागि उम्मेदवार छनोटको मापदण्ड र योग्यता तय गरेको हो ।

नेताहरुका अनुसार बैठकले उम्मेदवार बन्न ६ वटा आधार र योग्यता तय गरेको छ । पार्टीमा गरेको योगदान, कार्य क्षमता र कार्य कुशलता, दक्षतासहितको समावेशितालाई प्राथमिकता, क्रियाशिलता, निरन्तरता, निष्ठा र त्यागका आधारमा मूल्यांकन गरी उम्मेदवार तय गर्ने मापदण्ड ताकिएको छ ।

निर्वाचन प्रतिस्पर्धी पार्टीका उम्मेदवारको अवस्थालाई हेरेर उचित प्रतिस्पर्धा हुनेगरी स्थानीय तहमा उम्मेदवार तय गर्ने र स्थानीय तहको निर्वाचनमा अन्य पार्टीहरुसँग गठबन्धन गर्ने वा नगर्ने सम्बन्धमा सम्बन्धित स्थानीय तहलाई नै परिस्थितिअनुसार अघि बढ्ने अधिकार दिइएको छ ।

लुम्बिनी प्रदेशमा रहेका १०९ वटै स्थानीय तहमा उम्मेदवार तयार गरेर स्थानीय तहको चुनावमा भिड्ने तयारीका साथ अभियान थालेको छ । बुटवल, तुलसीपुर, घोराही र नेपालगञ्ज उपमहानगरमा समेत यो पटक जित्ने दावी कांग्रेसको छ ।

कांग्रेस लुम्बिनी प्रदेश समितिको बैठकले चैत दोस्रो साताभित्र स्थानीय तहका उम्मेदवारहरुको टुंगो लगाउने निर्णय पनि गरेको छ । अभियानमा कांग्रेस केन्द्रीय प्रतिनिधिको पनि उपस्थिति रहेको बताइएको छ ।