चुनावी कार्यक्रमबारे छलफल गर्न आजै डाकियो ७७ वटै जिल्ला कार्यसमितिको बैठक

२७ फागुन, काठमाडौं ।   नेपाली कांग्रेसले ७७ वटै जिल्ला कार्यसमितिको बैठक डाकेको छ । कांग्रेस केन्द्रीय कार्यलयकाअनु्सार केही जिल्लामा बैठक सुरु भएको र केहिमा तयारी भइरहेको छ ।

कांग्रेसले चुनावी प्रचार अभियान सम्पन्न गर्न ७७ वटै जिल्लामा कार्यसमितिको बैठक शुक्रबारका लागि बोलाइएको हो । पार्टी र भ्रातृ संस्थालाई व्यापक रुपमा परिचालन तथा केन्द्रको निर्णय कार्यान्वयन गर्नका लागि सबै जिल्ला कार्यसमितिले बैठक बोलाइएको मुख्य सचिव कृष्णप्रसाद पौडेलले जानकारी दिए ।

बैठकमा प्रचार अभियानमा संगठन सुदृढीकरण, जनताको गुनासो सुन्ने र कांग्रेसले गरेका सुधारका कार्य सुनाउने अभियानलाई प्रभावकारी बनाउने विषयमा छलफल हुनेछ । भेला, प्रशिक्षण, सम्मानलगायत कार्यक्रम पनि अभियानमा समेटिएकाले यसमा पनि छलफल हुने बताइएको छ ।

२९ गते आइतबारदेखि एक महिनासम्म कांग्रेसले स्थानीय चुनाव केन्द्रित प्रचार अभियान गर्दैछ । ‘घर घर जाऔं, कांग्रेस जिताऔं’ अभियानमा कांग्रेसले ७७ केन्द्रीय नेतालाई सबै जिल्लामा खटाएको छ । पार्टी निर्णय अनुसार अधिकांश नेताहरू तोकिएको जिल्लामा पुगेको पौडेलले बताए ।

केन्द्रबाट पठाइएका नेताको सहभागितामा जिल्ला कार्य समितिको बैठक बस्ने भएको हो । केन्द्रले बनाएको कार्यक्रमलाई प्रभावित नहुने गरी जिल्ला र प्रदेशले थप कार्यक्रम गर्नसक्ने कार्यदेश समेत मातहतका संरचनालाई दिइएको छ ।

कार्यकर्तालाई भूमिका दिएर प्रचारमा खटाउने कांग्रेसले नीति लिएको छ । पदीय जिम्मेवारी पाएर पनि भूमिका नभएको भन्दै असन्तुष्टि बढेपछि कांग्रेसले उक्त निर्णय लिएको पौडेलको भनाई छ ।