नेपाल राष्ट्र बैंकले करिब साढे ३ अर्ब मुद्दती निक्षेपमा लगानी गर्दै

११ चैत, काठमाडौं । नेपाल राष्ट्र बैंकले करिब साढे ३ अर्ब रुपैयाँ बैंक तथा वित्तीय संस्थाको मुद्दति निक्षेपमा राख्ने भएको छ। केन्द्रिय बैंकले पेन्सन तथा उपदान कोषमा रहेको साढे ३ अर्ब बैंक तथा वित्तीय संस्थाको मुद्दति निक्षेपमा राख्ने जनाएको छ।

केन्द्रिय बैंकले पेन्सन तथा उपदान कोषमा रहेको ३ अर्ब ४५ करोड रुपैँया मध्ये १ अर्ब ७२ करोड ५० लाख रुपैयाँ वाणिज्य बैंक,५१ करोड ७५ लाख रुपैयाँ विकास बैंक र २७ करोड ६० लाख रुपैयाँ फाइनान्स कम्पनीहरुमा लगानी गर्ने छ। यस्तै अन्य कोषमा रहेको १ अर्ब ९३ करोड २६ लाख रुपैयाँमध्ये वाणिज्य बैंकहरुमा १ अर्ब ५४ करोड ६२ लाख,विकास बैंकहरुमा २८ करोड ९८ लाख र फाइनान्स कम्पनीहरुमा ९ करोड ६६ लाख लगानी गर्ने छ।

केन्द्रिय बैंकले उक्त निक्षेप २०७९ बैशाख गतेदेखि २०८० बैशाखसम्मको लागि मुद्दतिमा राख्न लागेको हो। एक वर्ष अवधिको लागि राख्न लागेको उक्त निक्षेप लिन चाहाने बैंक तथा वित्तीय संस्थाहरुले चैत १५ गतेसम्ममा ब्याजदर प्रस्ताव गरी आवेदन पेश गरिसक्नुपर्ने छ।

यसरी राखिएको मुद्दती निक्षेपको ब्याज बैंक तथा वित्तीय संस्थाले मासिक रुपमा भुक्तानी गर्नुपर्ने राष्ट्र बैंकले जनाएको छ। बोलकबोलमा बढी ब्याज प्रस्ताव गर्ने बैंकमा केन्द्रिय बैंकले निक्षेप राख्नेछ।