८ महिनामा आयात ३८.६ प्रतिशत र निर्यात ८२.९ प्रतिशतले बढ्यो

२९ चैत, काठमाडौं । चालु आर्थिक वर्षको फागुन महिनासम्ममा आयात र निर्यात बढेको छ । गत वर्षको आठ महिनाको तुलनामा आयात ३८.६ प्रतिशत र निर्यात ८२.९ प्रतिशतले बढेको हो । नेपाल राष्ट्र बैंकले सार्वजनिक गरेको तथ्यांक अनुसार चालु आवको ८ महिनासम्ममा आयात र निर्यात दुवै बढेको तथ्यांक सार्वजनिक गरेको छ ।

फागुन मसान्तसम्म कुल वस्तु निर्यात ८२.९ प्रतिशतले वृद्धि भएर १ खर्ब ४७ अर्ब ७५ करोड रुपैयाँ पुगेको छ । अघिल्लो वर्षको सोही अवधिमा यस्तो निर्यात ७.८ प्रतिशतले मात्र वृद्धि भएको थियो ।

त्यस्तै कुल वस्तु आयात भने ३८.६ प्रतिशतले बढेर १३ खर्ब ८ अर्ब ८३ करोड रुपैयाँ पुगेको छ । अघिल्लो वर्षको सोही अवधिमा यस्तो आयात २।१ प्रतिशतले मात्र बढेको थियो ।

८ महिनामा कुल वस्तु व्यापार घाटा ३४.५ प्रतिशतले वृद्धि भएर ११ खर्ब ६० अर्ब ९९ रुपैयाँ करोड पुगेको छ । अघिल्लो वर्षको सोही अवधिमा यस्तो घाटा १.६ प्रतिशतले बढेको थियो ।