नेपाल प्रहरीको २९ औं आईजीपीमा धीरजप्रताप सिंहलाई नियुक्त गर्ने सरकारको निर्णय

१८ वैशाख, काठमाडौं । सरकारले नेपाल प्रहरीको प्रमुख ( २९ औं आईजीपी) मा प्रहरी अतिरिक्त महानिरीक्षक (एआईजी) धीरजप्रताप सिंहलाई नियुक्त गरेको छ । आइतबार बसेको मन्त्रिपरिषद बैठकले सिंहलाई प्रहरी महानिरीक्षक (आईजीपी) मा बढुवा गरेको हो ।

सिंह केन्द्रीय अनुसन्धान ब्यूरो (सीआईबी) मा कार्यरत थिए । सिंहसँगै विश्वराज पोखरेल, सहकुलबहादुर थापा र रवीन्द्रबहादुर धानुक पनि प्रहरी महानिरीक्षक बन्ने दौडमा थिए । तर सरकारले तेस्रो वरियतामा रहेका सिंहलाई आईजीपी नियुक्त गरेको हो ।

पोखरेल र थापालाई केपी शर्मा ओली नेतृत्वको सरकारले दरबन्दी थप गरेर आईजीपीको रोलक्रममा ल्याउने गरी एकल बढुवा गरेर एआईजी बनाएको थियो । तर शेरबहादुर देउवा नेतृत्वको सरकारले वरियतामा पोखरेल र थापाभन्दा पछाडि रहेका सिंहलाई आईजीपी बनाएको छ ।

आईजीपीमा बढुवा भएका धीरजप्रताप सिंह नेपाल प्रहरीमा १२ चैत्र २०४९ मा प्रवेश गर्दा पहिलो नम्बरको इन्स्पेक्टर बन्न सफल भएका थिए । सेवा प्रवेश गर्दा नै नम्बर एक बनेका उनले एसपी बढुवासम्म अग्रता कायम राख्न सफल भए । २०६१ मा डीएसपी हुँदा पनि उनी नम्बर एक नै बनेर बढुवा भए । २०६९ मा एसपी हुँदा पनि सिंह नम्बर वान नै रहे ।

तर, एसएसपी बढुवा हुँदा २ नम्बरमा परे । उनलाई विश्वराज पोखरेलले उछिने । त्यसपछि पोखरेलले छलाङ मारेर आफूभन्दा अघिल्लो ब्याचीलाई पनि उछिनेर डीआईजी बढुवा पाए । यो घटनाले प्रहरीभित्र निकै असन्तुष्टि छायो । एआईजी बढुवा हुँदा पनि दरबन्दी नै बढाएर भए । त्यतिबेला उनले आफूभन्दा दुई ब्याच माथिकालाई उछिनेका थिए ।

पोखरेलको यो छलाङ रोकिएको छ । धीरजप्रताप सिंहले आईजीपीमा बाजी मारेका छन् । सिंहको ब्याची विश्वराज पोखरेल इन्स्पेक्टर भएर सेवा प्रवेश गर्दा १६ नम्बरमा थिए । डीएसपी हुँदा १८ र एसपी हुँदा ५ नम्बरमा थिए । तर, एसएसपी हुँदा आफ्ना ब्याचीका ४ जनालाई उछिनेर नम्बर वान बन्न पुगेका छन् ।

नेपाल प्रहरीमा अपराध अनुसन्धानमा अब्बल मानिएका सिंहले जोखिमयुक्त ठाउँको कमाण्ड सम्हाले । उनी पर्सा प्रहरी प्रमुख भएर काम गरे । अपराध अनुसन्धान महाशाखाको पनि कमाण्ड सम्हाले । प्रदेश नं २ को कमाण्ड सम्हाले । सीआईबीमा रहेर उनको कार्यकालमा जोखिमयुक्त कार्य सम्पन्न गरेका थिए ।