गाउँ मिलाउन सभापति देउवा डडेलधुरातिर, अध्यक्ष ओली झापातिर

२७ बैशाख, काठमाडौं । छुट्टाछुट्टै गठबन्धन बनाएर स्थानीय तह निर्वाचनमा होमिएका नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओली मंगलबार विहानैदेखि गृह जिल्लाको व्यवस्थापन मिलाउन क्रियाशील छन् ।

एमाले अध्यक्ष ओली गृहनगर झापाको काम सकेर दिउँसो चुनावी सभालाई सम्बोधन गर्न काठमाडौं आउँदै छन् भने प्रधामन्त्री समेत रहेका कांग्रेस सभापति देउवा मतदान सकेर मात्रै काठमाडौं फर्कने कार्यक्रम छ ।

चुनावी अभियानका क्रममा देश दौडाहमा रहेका देउवा मंगलबार गृहजिल्ला डडेलधुरामा छन् । देउवाले आज गृहजिल्लामा हुने दुईवटा चुनावी सभालाई सम्बोधन गर्नेछन् ।

प्रधानमन्त्रीका प्रेस संयोजक गोविन्द परियारका अनुसार देउवा सभा सकेर गृहजिल्लामा नै बस्नेछन् । देउवाले पूर्वमा विराटनगरदेखि काठमाडौं, चितवन, दाङलगायत विभिन्न स्थानमा भएका सत्ता गठबन्धनको चुनावी सभालाई सम्बोधन गरेका थिए ।

उनको गृहनगरमै कांग्रेसबाट बागी परेकाले मिलाउन समस्या छ । पूर्व जिल्ला सभापति कर्ण मल्ल अहिले पूर्णरुपले देउवा पक्षलाई हराउने अभियानमा छन् । पूर्वमन्त्री एव कांग्रेस नेता पुस्करनाथ ओझाले पनि देउवालाई साथ दिएका छैनन् । उनी देउवापत्नी आरजुलाई हराउन लागेको आरोपमा कारवाहीमा परेपछि देउवासँग टाढिएका छन् ।

यता, एमाले अध्यक्ष ओली मंगलबार गृहजिल्ला झापाको दमक पुगेका छन् । उत्तरी मोरङको मिक्लाजुङस्थित मधुमल्लामा आयोजित चुनावी सभामा भाग लिएर उनी झापातिर लागेका हुन् । गठबन्धनका कारण ओलीको गृहनगर दमक नगरपालिका एमालेबाट फुत्कने अवस्थामा छ ।

ओलीले एमालेले देश विकासको एजेन्डा लिएर अघि बढेको र सरकार चलाउँदा धेरै काम गरेको जिकिर गर्दै सत्ता गठबन्धन दलले आफ्ना छोरीबुहारीलाई मात्र निर्वाचनमा उठाएको दावी गर्दै दमकमा गठबन्धका नेतालाई भोट नदिन स्थानीय मतदातासँग आग्रह गर्नेछन् ।

ओलीको गृहनगर दमकमा राप्रपासहित नेपाली कांग्रेस, जसपालगायत दलको गठबन्धनले एमालेलाई चुनावी चुनौती दिएको छ । ओलीले दमकमा पनि चुनावी सभालाई सम्बोधन गर्नेछन् । ओलीले आज झापाका गौरीगन्ज गाउँपालिका, कमल गाउँपालिका र गौरादह नगरपालिकामा आयोजना हुने चुनावी सभालाई सम्बोधन गरी काठमाडौं फर्कने कार्यतालिका रहेको एमालेले जनाएको छ ।