कुरा कम र काम धेरै गर्ने कांग्रेसलाई मतदान गर्न देउवाको आग्रह

२७ बैशाख काठमाडौं । नेपाली कांग्रेसका सभापति शेरबहादुर देउवाले ३० वैशाखमा हुने स्थानीय तह निर्वाचनमा पार्टीका उम्मेदवारहरूलाई अत्यधिक मत दिएर विजयी बनाउन मतदातासँग आग्रह गरेका छन् । उनले कांग्रेसले भनेका कुरा पूरा गर्ने भन्दै मतदातालाई खोक्रो नारा र सस्तो लोकप्रियताको भ्रममा नपर्न भनेका छन् ।

मौन अवधि सुरु भएपछि मत माग्न नपाइने भएकाले देउवाले मंगलबार एक अपिल जारी गर्दै उम्मेदवारहरूलाई विजयी गराउन मतदातासँग आग्रह गरेका हुन् । उनले कांग्रेसलाई भोट माग्दै आफूहरु जे भन्छौं त्यो पूरा गरेर छाड्ने बताएका छन् ।

स्थानीय तहको निर्वाचन सम्पन्न गराएर संविधानको कार्यान्वयनमा फेरि एकपटक ईटा थप्ने अवसर कांग्रेसलाई प्राप्त भएको भन्दै देउवाले स्थानीय तह निर्वाचनमा मत व्यक्त गर्दा ध्यान दिन मतदातालाई अपिल गरेका हुन् ।

लोकतान्त्रिक संस्कार र संस्कृतिमा आधारित समतामूलक समाज निर्माणका लागि उपयुक्त पात्रलाई राजनीतिको बागडोर जिम्मा लगाउने अधिकार मतदाताको हातमा आएको उनको भनाई छ । सबल स्थानीय सरकार, समुन्नत गाउँ र समुन्नत नगर कांग्रेसको मूलमन्त्र भएको देउवाको भनाई छ ।

उनले संविधान सभाले बनाएको संविधानलाई कुल्चेर जनादेशको घोर अपमान गरी पटक–पटक संसद विघटन गरेर अधिनायकवादी शैली प्रदर्शन गर्दा कांग्रेसले संविधानको रक्षा गरेको दावी गरे । यही परिवेशमा पाँच दलीय गठबन्धन बनेको भन्दै देउवाले यो निर्वाचनमा समेत गठबन्धनलाई निरन्तरता दिनुपर्ने बताएका छन् ।

अपिलमा भनिएको छ, ‘सङ्घीय लोकतान्त्रिक गणतन्त्रलाई जगैदेखि संस्थागत र सुदृढ गर्ने स्थानीय तह निर्वाचनको यो महान् अभियानमा निर्भिकता साथ सहभागी भई मतदान गर्न आह्वान गर्दछु ।’ अपिलमा उनले स्थानीय तह निर्वाचनलाई लोकतन्त्रको बलियो आधार भएको बताएका छन् ।