सामाजिक सञ्जालमार्फत शीर्ष नेताको अपिल, ‘मौन अवधिमा हुँने आर्थिक चलखेलप्रति सजग रहनू’

२९ बैैशाख, काठमाडौं । समाजिक सञ्जालमार्फत नेकपा एमालेका अध्यक्ष केपी शर्मा ओली र नेपाली कांग्रेसका वरिष्ठ नेता रामचन्द्र पौडेलले मौन अवधिमासमेत मतदातालाई सम्बोधन सुरक्षित भविष्यको निम्ति मतको सदुपयोग गर्न र यो समयमा हुने आर्थिक चलखलप्रति सजग रहन आग्रह गरेका छन् ।

एमाले अध्यक्ष ओलीले चलखेल गर्नेको पहिचान गरी सम्बन्धीत निकायमा खबर गर्न अनुरोध गरेका छन् भने पौडेलले असल व्यक्ति र पार्टीको पहिचान गरी मतदान गर्न भनेका छन् ।

ओलीले एमालेको आधिकारिक फेसबुक पेज मार्फत भनेका छन्, ‘मौन अवधि चलिरहेको छ । यो समयमा मतदाता भड्काउन अनेक चलखेल हुन सक्छ, त्यसता कार्य गर्ने सबैलाई प्रतिवाद गरी तिनको पहिचान गरी सम्बन्धीत निकायमा खबर गर्नुहोला ।’

उनले सबैलाई मतदान पक्रियामा सहभागी हुन पनि अनुरोध गर्दै समृद्ध नेपाल सुखी नेपालीका लागि सबै सभ्य नागरिक मतदान प्रकृयामा सहभागी हुन भनेका छन् ।

यस्तै नेपाली कांग्रेसका वरिष्ठ नेता पौडेलले सुरक्षित र राम्रो भविष्यका लागि आफ्नो मतको सदुपयोग गर्न अपिल गरेका छन् । शुक्रबार हुने स्थानीय तह निर्वाचनको मौन अवधि कायम रहेका बेला बिहीबार दिउँसो १२ बजेर ४१ मिनेटमा आफ्नो आधिकारिक पेसबुक पेजमार्फत नेता पौडेलले मतको सदुपयोग गर्न अपिल गरेका हुन् ।

‘निर्वाचन लोकतन्त्रको सुनौलो अवसर पनि हो । राम्रो र सुरक्षित भविष्यको निम्ति आफ्नो मतको सदुपयोग गरौं,’ उनले अपिलमा भनेका छन् । स्थानीय तह निर्वाचन शुक्रबार हुँदै छ । शुक्रबार बिहान ७ बजेदेखि बेलुका ५ जेसम्म मतदानको समय तोकिएको छ । मंगलबार मध्यराति १२ बजेबाट मौन अवधि सुरु भएको छ ।