निर्वाचनलाई राष्ट्रिय उत्सवका रुपमा लिएर निर्धक्क मतदान गर्न राष्ट्रपतिको आह्वान

२९ बैशाख, काठमाडौं । राष्ट्रपति विद्यादेवी भण्डारीले स्थानीय निर्वाचनलाई राष्ट्रिय उत्सवका रुपमा लिएर निर्धक्कासाथ मतदानमा सहभागी हुन आह्वान गरेकी छन् ।

भण्डारीले निर्वाचन लोकतन्त्रको सबैभन्दा ठूलो उत्सव भएको भन्दै निर्धक्क भएर मताधिकारको प्रयोग गर्न सबै मतदातामा आह्वान गरेकी हुन् ।

वैशाख ३० गते शुक्रबार सम्पन्न हुन गइरहेको स्थानीय तहको निर्वाचन सम्बन्धमा राष्ट्रपतिले बिहीबार एक भिडियो सन्देशमार्फत् स्वतन्त्र, निष्पक्ष र भयरहित वातावरणको निर्माण गर्नु सबैको दायित्व भएको बताएकाी छन् ।

जनताले निर्वाचित गरेका जनप्रतिनिधिबाट शासन सञ्चालन हुनु लोकतन्त्रको सबैभन्दा सुन्दर पक्ष रहेको राष्ट्रपतिको सन्देशमा उल्लेख छ ।

आवधिक निर्वाचनले जनतामा निहित सार्वभौमसत्तालाई औपचारिकरूपले अभिव्यक्त गर्ने भएकाले राज्यशक्तिको वास्तविक स्रोत जनतामा रहेको सत्यलाई व्यवहारमा प्रकट गर्ने राष्ट्रपतिले आफ्नो सन्देशमा भनेकी छन् ।

उनले निर्वाचन समाज र राष्ट्रको विकासका मुद्दालाई जनताको घरदैलोमा पुर्याउने विशेष अवसरको रुपमा ग्रहण गर्नुपर्ने बताउँदै मतदानले हरेक नेपालीको विकास लक्ष्यमा सहभागी गराउने बताएकी छन्