मध्यान्ह १२ बजेसम्म देशभर ३५ प्रतिशत मत खस्यो, केहीमा अवरुद्धः निर्वाचन आयोग

३० बैशाख, काठमाडौं ।  निर्वाचन आयोगले सात जिल्लाका केही मतदान केन्द्र अवरुद्ध भएपछि ३५ प्रतिशत भन्दा माथि मत खसेको जनाएको छ । स्थानीय तह निर्वाचन २०७९ मा शुक्रबार बिहानैदेखि उत्साहजनक रूपमा मतदान भइरहेको आयोगको भनाई छ ।

आयोगका अनुसार १२ बजेसम्म देशभर करिब ३५ प्रतिशतमाथि मतदान भएको रेकर्ड आएको छ । मुलुकका १० हजार ७५६ मतदानस्थलका २१ हजार ९५५ मतदान केन्द्रमा मतदान भइरहेको आयोगले जनाएको छ ।

दोलखा, सर्लाही, सप्तरी, रामेछाप, पर्वत, हुम्ला र बाजुराका केही मतदानस्थलमा सामान्य विवादका कारण मतदान कार्य अवरुद्ध भएको आयोगले जनाएको छ । ती ठाउँमा पुनः मतदान सुरु गर्न प्रयास भइरहेको पनि आयोगले जनाएको छ ।