मोदीको सुरक्षा नेपाली सेनाले गर्ने, सुरक्षाका सबै अंग लुम्बिनीका केन्द्रीत

१ जेठ, काठमाडौं । नेपाल भ्रमणमा आउन लागेका भारतीय प्रधानमन्त्री नरेन्द्र मोदीको सुरक्षाका जिम्मा नेपाली सेनाले लिएको छ । सरकारले नेपाली सेनालाई सुरक्षा अंगसँग समन्वय गर्दे सुरक्षा कमाण्ड गर्ने जिम्मेवारी दिएको हो ।

हाल नेपाली सेना, नेपाल प्रहरी, सशस्त्र प्रहरी तथा राष्ट्रिय अनुसन्धान विभागका अधिकारीहरु भारतीय प्रधानमन्त्री मोदीको सुरक्षा व्यवस्थाका लागि लुम्बिनी पुगेका छन् । अहिले सुरक्षा निकायलाई सरकारले लुम्बिनीमा केन्द्रीत गरेको छ । नेपाली सेनाको नेतृत्वमा तीन वटै सुरक्षा निकायलाई लुम्बिनीमा केन्द्रीत गरेको हो ।

जेठ दुई गते बुद्ध जयन्तीको अवसरमा नेपाल भ्रमणमा भारतीय प्रधानमन्त्री मोदी नेपाल भ्रमणमा आउन लागेका हुन् । मोदीको सुरक्षाको कमाण्ड गर्ने जिम्मेवारी नेपाली सेनाले पाएको हो । मोदीको सुरक्षाकै लागि नेपाल प्रहरीका प्रहरी अतिरिक्त महानिरीक्षक (एआईजी) सहकुल थापा समेत शनिवार लुम्बिनी पुगिसकेका छन् ।

त्यसैगरी सशस्त्र प्रहरीले पनि आफ्नो तर्फबाट सुरक्षा व्यवस्था चुस्त राखेको जनाएको छ । भ्रमण अवधिभर नेपाली सेनाको हेलिकोप्टर मार्फत सुरक्षा गस्ती र सुरक्षाको पहिलो घेरामा नेपाली सेनाले कमाण्ड गर्ने भएको हो । ‘भारतीय प्रधानमन्त्रीको साथमा आउने सुरक्षाकर्मीहरुको सहयोगमा नेपाली सेनाले सुरक्षाको जिम्मा लिनेछ त्यसमा नेपाल प्रहरी र सशस्त्र प्रहरीले सहयोग गर्नेछ ’, गृहमन्त्रालय उच्च स्रोतले भन्यो ।

मोदीको सुरक्षा व्यवस्था मिलाउन भन्दै भारतीय उच्चस्तरीय सुरक्षाकर्मीको टोली रुपन्देही आएको छ । गत हप्ता भैरहवास्थित गौतमबुद्ध अन्तर्राष्ट्रिय विमानस्थलमा भारतीय विमानमार्फत सो टोली आएको थियो । विमानमा भारतीय सैनिक अधिकारीहरु छन् । सो टोलीमा ३० जना सुरक्षाकर्मी रहेका छन् । २५६६ औँ बुद्ध जयन्तीका अवसरमा मोदी लुम्बिनी आउन लागेका हुन् ।

उनी हेलिकप्टरबाट लुम्बिनी आउँदै छन् । लुम्बिनीमा चारवटा हेलिप्याड बनाइएको छ । प्रधानमन्त्री मोदी आउने भएपछि लुम्बिनी क्षेत्र वरिपरिको सुरक्षा तथा अन्य व्यवस्थापनको लागि भारतबाटै आएको सुरक्षाकर्मीहरुको टोलीले नेपाली सुरक्षाकर्मीहरुको सहयोगमा कार्यक्रम स्थल, मोदी बस्ने होटल लगायत वरपरको सुरक्षा व्यवस्थापन खटिएको छ ।

मोदीको भ्रमण कार्यक्रममा नेपालका प्रधानमन्त्री शेरबहादुर देउवा पनि लुम्बिनी जाँदैछन् । भारतीय प्रधानमन्त्रीको रूपमा दोस्रो कार्यकाल समालेपछि भारतीय प्रधानमन्त्रीको यो पहिलो नेपाल भ्रमण हुनेछ । यसअघि मोदी सन् २०१९ मा नेपाल आएका थिए । केही समयअधि नेपालका प्रधानमन्त्री शेरबहादुर देउवाले पनि भारतको भ्रमण गरेका थिए ।

लुम्बिनीमा हेलिकप्टरमार्फत् आउने मोदीले मायादेवी मन्दिरमा पूजाआजा, अशोक स्तम्भमा दीप प्रज्ज्वलन र पुष्करणी पोखरी दक्षिणमा रहेको बोधी वृक्षमा विश्राम गर्ने कार्यक्रम तय गरिएको छ । मोदी हेलिकोप्टरमा भारतीय सीमावर्ती सहरबाट लुम्बिनी आउनेछन् । मोदीको यो पाँचौँ नेपाल भ्रमण हो । भारतीय प्रधानमन्त्री मोदीलाई परराष्ट्रमन्त्री डा. नारायण खड्काले हेलिप्याडमा स्वागत गर्नेछन ।

प्रधानमन्त्री शेरबहादुर देउवा र मोदीबीच पवन प्यालेस होटेलमा भेटवार्ता हुनेछ । त्यहाँ मोदी इन्टरनेसनल बुद्धिष्ट फोरमको बैठकमा सहभागी हुनेछन्।मोदीले एक बिघा जमिनमा एक अर्ब ६० करोड रुपैयाँमा निर्माण हुने बौद्ध विहारको शिलान्यास गर्ने कार्यक्रम छ । मोदी र देउवाले मायादेवी मन्दिरमा दीप प्रज्वलनसहित पूजाआजा गर्नेछन् ।