निर्वाचित वडाअध्यक्षलाई निकटम प्रतिद्वन्दीको बधाई राजनीतिक संस्कारको थालनी भयो : स्थानीय

२ जेठ, वीरगञ्ज । पर्साको ठोरी गाउँपालिका वडा नम्बर १ का निर्वाचित वडाअध्यक्षलाई निकटम प्रतिद्वन्दीले बधाई तथा शुभकामना दिएका छन् ।

६ सय ५१ मत ल्याई वडाअध्यक्षमा निर्वाचित भएका नेकपा एमालेका धनमान थापासहितको प्यानललाई नेपाली कांग्रेसबाट वडाअध्यक्षका उम्मेदवार नवराज फुयाँलले बधाई तथा शुभकामना दिएका हुन् ।

६ सय ३० मत पाएर २१ मतको झिनो मतान्तरले पराजित भएका फुयाँलले निर्वाचित वडाअध्यक्षलाई बधाई दिँदै वडाको र वडाबासीको बिकास र समृद्धिका लागि एकबद्ध भएर काम गर्ने प्रतिबद्धता जनाएका छन् ।

फुयाँलको भागमा परेको १ सय १३ मत बदर हुँदा पराजय भोग्नुपरेको बताउँदै उनले मतदाता शिक्षा दिन चुकेको स्विकार गरेका छन् ।

प्रतिद्वन्दीको अनुहारसमेत हेर्न नचाहने र खोजी खोजी कमजोरी औँल्याएर आरोप प्रत्यारोप गर्ने प्रवृतिसामु फुयाँलले बधाई दिएर राजनीतिक संस्कार देखाएको भनेर सामाजिक सञ्जालमा प्रशंसा भइरहेको छ ।

उनले मत नजितेपनि मन जितेको स्थानीय निरज कार्की बताउँछन् । ठोरी १ मा राजनीतिक संस्कारको थालनी गरेर असल नेतृत्वको उदाहरण बनेको स्थानीय प्रकाश खनालको भनाई छ ।