संसद् अवरोधबारे पार्टीको सर्कुलर पर्खदै एमाले सांसद, माथिबाट निर्णय नआउँदा अलमल

३ जेठ, काठमाडौं । नेकपा एमालेले राखेका माग यथावत रहेको अवस्थामा सुरु हुन लागेको संघीय संसद्को अधिवेशनमा के गर्ने भन्ने विषयमा एमाले सांसदहरु अलमलमा परेका छन् ।

प्रतिनिधि सभाका सभामुल अग्निप्रसाद सापकोटाको राजीनामा र एमालेले कारवाही गरेका सांसदलाई पदबाट हटाउनुपर्ने मुख्य माग राखेर उसले यसअघिको संसद अधिवेशनमा सदन अवरोध गर्दै आएको थियो ।

मंगलबार अपरान्ह ४ बजे संघीय संसदको दुवै सदनका बैठक आह्वान गरिएको छ । तर, एमालेले अवरोध गर्ने या नगर्नेबारे कुनै निर्णय लिएको छैन । एमाले संसदीय दलका उपनेता सुवासचन्द्र नेम्वाङले संघीय संसद्मा अवरोध गर्ने कि नगर्ने भन्नेबारे नयाँ निर्णय भइनसकेको बताएका छन् ।

मंगलबार मदन–आश्रित स्मृति दिवसको अवसरमा बल्खुमा आयोजित कार्यक्रमपछि उनले संसद्को अवरोधका विषयमा दिउँसो ३ बजेसम्ममा निर्णय हुने बताएका थिए । तर, के गर्ने भन्नेबारे अहिले सम्म कुनेपनि एमाले सांसदलाई सर्कुलर नगएको बताइएको छ ।

स्थानीय तहको निर्वाचनका कारण यसबारे पार्टी छलफलमा रहे पनि निर्णयमा नपुगेको नेम्वाङको भनाई थियो । उनले पार्टीका शीर्ष नेताहरू संसद्मा कसरी प्रस्तुत हुने भनेर निर्णय लिनका लागि परामर्श भइरहेको मात्रै पत्रकारहरुलाई जानकारी गराएका छन् ।

प्रतिनिधिसभा र राष्ट्रिय सभाको बजेट अधिवेशनको पहिलो बैठक ४ बजे बस्दैछ । २०७८ भदौयता संघीय संसद्का दुवै सदन अवरोध गर्दै आएको एमालेले नयाँ अधिवेशनमा के गर्ने भन्नेबारे निर्णय गरिसकेको छैन ।

एमाले विभाजन गर्न सरकारले अध्यादेश ल्याएको र माधवकुमार नेपालको नेतृत्वमा पार्टी विभाजन गरिएको भन्दै एमाले संसद्मा अवरोध गर्दै आइरहेको छ ।

एमाले अध्यक्ष केपी शर्मा ओलीले सोहो विषयलाई लिएर सर्वोच्च अदालतमा मुद्दा पनि दायर गरेका छन् । उक्त मुद्दा पटकपटक पेसी चढेपनि सुनुवाई हुन सकेको छैन ।