सरकारले माग सम्बोधन नगरेको भन्दै एमाले सांसदद्वारा राष्ट्रिय सभा बैठक अवरुद्ध

३ बैशाख, काठमाडौं । प्रतिनिधि सभाको बैठक अवरोध नगरेको प्रमुख प्रतिपक्ष दल नेकपा एमालेले राष्ट्रिय सभा बैठक भने अवरुद्ध गरेको छ । प्रतिनिधि सभाको बैठकमा बोल्दै एमाले उपमहासचिन प्रदिप ज्ञवालीले संसद अवरुद्ध नगर्ने बताएका थिए ।

बजेट अधिवेशनको पहिलो दिन मंगलबार अपरान्ह बोलाइएको राष्ट्रिय सभा बैठक सुरु हुनासाथ एमालेका सांसदहरुले उभिएर अवरुद्ध गरेका हुन् । प्रतिनिधिसभामा भने एमालेको अवरोध हटेको छ ।

सभामुख अग्निप्रसाद सापकोटा र सत्तारुढ गठबन्धन दलका नेता प्रधानमन्त्री शेरबहादुर देउवाले आफूहरुले अगाडि सारेका माग सम्बोधन गर्न पहल समेत गर्न नचाहेकाले राष्ट्रिय सभा बैठकलाई अवरुद्ध पार्ने कामलाई आफ्नो दलले निरन्तरता दिन बाध्य हुनु परेको एमालेका सांसदहरुले बताएका छन् ।

प्रतिनिधि सभा र राष्ट्रिय सभामा मंगलबारदेखि अर्थमन्त्री जनार्दन शर्माले प्रतिनिधिसभामा पेस गरेको विनियोजन विधेयकका सिद्धान्त र प्राथमिकतामाथि छलफल हुँदैछ । एमालेले अवरोध गरेपछि राष्ट्रिय सभाको बैठक प्रभावित हुनेछ ।