स्याङ्जाको वालिङमा नगरपालिका प्रमुखमा एमाले र उपप्रमुखमा कांग्रेस विजयी

४ जेठ, स्याङ्जा । स्याङजाको वालिङ नगरपालिको मेयरमा नेकपा एमाले र उपमेयरमा नेपाली कांग्रेसका उम्मेदवार विजयी भएका छन् । मेयरमा एमालेका कृष्ण खाँण विजयी भएका छन् भने उपमेयरमा कांग्रेसकी कविता तिवारी विजयी भएकी छन् ।

वालिङ नगरपालिकाका निवर्तमान मेयर कांग्रेसका दीलिपप्रताप खाँणलाई २ हजार १ सय ८३ मतान्तरले पछाडि पार्दै एमालेका कृष्ण विजयी भएका हुन् । बुधबार सकिएको मतगणना परिणाम अनुसार कृष्णले १३ हजार ७ सय ७६ मत प्राप्त गर्दा पराजित भएका दीलिपले ११ हजार ५ सय ९३ मत ल्याए ।

उपमेयरमा प्रतिस्पर्धी एमालेकी खगिसरा थापालाई ४ सय ८२ मतान्तरले पछि पार्दै कांग्रेसकी कविता तिवारी विजयी भएकी छन् । तिवारीले १२ हजार ८ सय २२ मत प्राप्त गरिन् । थापाले भने १२ हजार ३ सय ४० मत प्राप्त गरेकी छन् । थापा २०७४ को स्थानीय तह निर्वाचनमा कांग्रेसकी कल्पना तिवारीसँग उपमेयरमै पराजित भएकी थिइन् ।

वालिङ नगरपालिकाका १४ वडामध्ये कांग्रेसले ६ र एमालेले ८ वडाध्यक्ष जितेका छन् । निर्वाचन कार्यालयको सचिवालयका अनुसार वडा नम्बर १ मा कांग्रेसका पदमराज गुरुङ, २ मा कांग्रेसका पोतबहादुर लम्साल, ३ मा एमालेका भीमबहादुर गुरुङ विजयी भएका छन् ।

यस्तै ४ मा एमालेका हरिप्रसाद खनाल, ५ मा कांग्रेसका छवि आले, ६ मा एमालेका श्यामकृष्ण श्रेष्ठ, ७ मा एमालेका पाण्डुकुमार थापा, ८ मा एमालेका दामोदर तिवारी, ९ मा एमालेका अमृत श्रेष्ठ, १० मा कांग्रेसका सुनिल खनाल, ११ मा कांग्रेसका डण्डापानी पंगेनी, १२ मा एमालेका विश्वजंग गुरुङ, १३ मा एमालेका नमलाल डुम्रे र १४ मा कांग्रेसका राजु कुँवर अध्यक्ष निर्वाचित भएका छन् ।