चुनावी परिणामबाट कांग्रेस उत्साहित वा निरुत्साहित छैन, सबै विषयको समीक्षा हुन्छः महामन्त्री शर्मा

५ जेठ, काठमाडौं । नेपाली कांग्रेसका महामन्त्री विश्वप्रकाश शर्माले स्थानीय तह निर्वाचनको परिणामले कांग्रेस उत्साहित वा निरुत्साहित नभएको बताचएका छन् । उनले चुनवामा आएका केही परिणामले दालहरुका आगामी दिन समीक्षात्मक भएको बताएका छन् ।

महामन्त्री शर्माले सत्ता गठबन्धनमा रहेका दलहरुबीच गरिएको चुनावी तालेमेलका सकारात्मक र नकारात्मक दुवै पक्ष रहेको भन्दै समग्रमा तालमेल सकारात्मक रहेको बताएका छन् । निर्वाचनको परिणाम सार्वजनिक भइरहँदा कांग्रेस पहिलो दल बन्ने निश्चित भएको बेला महामन्त्री शर्माको यो प्रतिक्रिया आएको हो ।

परिणाम आइसकेपछि भने निर्वाचनमा भएको तालमेलबारे पनि समीक्षा गरिने उनको भनाइ छ । ‘प्रधानमन्त्री शेरबहादुर देउवाले निर्वाचन नै गर्न सक्दैन भन्ने पनि थियो । पहिले तीन चरणमा भएको थियो । तर, यस पटक एकै चरणमा भयो । परिणाम पनि उत्साहजनक आयो । परिणामलाई सकारात्मक भनेर अगाडि बढ्नुपर्छ’, उनले भने, ‘निर्वाचनमा भएको तालमेलबारे पनि समीक्षा हुन्छ ।’

कांग्रेस पहिलो दल बन्ने अवस्थामा पुग्नु कतै गठबन्धन दलहरूबीच भएको तालमेल त कतै एक्लै निर्वाचन लड्दा निकालिएको परिणाम भएको शर्माले बताए । उनले आगामी प्रदेश र सङ्घीय संसद्को निर्वाचनमा पनि तालमेल हुन सक्ने या नसक्ने विषय दलबीचको समझदारी र राष्ट्रिय आवश्यकता अनुसार हुने उनको भनाई छ ।

‘यो तालमेल स्थानीय तहको निर्वाचनको लागि थियो । तालमेल राम्रै भयो गठबन्धन दलहरूबीच’, शर्माले भने, ‘कांग्रेसले खोलो तरेपछि लौरो बिर्सने काम गर्दैन । त्यसको अर्थ देशभर तालमेल गर्नुपर्छ भन्ने छैन ।’ १७ चैतमा गठबन्धन दलहरूबीच भएको सहमतिअनुसार ३० वैशाखमा भएको स्थानीय तह निर्वाचनमा दुई सय बढी स्थानीय तहमा तालमेल भएको थियो ।

तालमेलकै कारण २०७४ सालको निर्वाचनबाट पहिलो बनेको दल एमाले दोस्रो हैसियतमा रहने देखिएको छ । उनले अहिलेको निर्वाचनले सबै दलहरुलाई आफ्नो र आफ्ना नीति र व्यवहारकाबारे सोचेर समीक्षा गर्न बाध्य बनाएको शर्माले बताए । न्युज कारखाना