संसद बैठक: हाजिरमा देखिन्छ, हलमा देखिदैनन् सांसद

५ जेठ काठमाडौं । यति बेला संघीय संसद अन्तर्गतका प्रतिनिधिसभा र राष्ट्रियसभाका बैठकहरु चलिरहेका छन् ।  बैठकमा आगामी आर्थिक वर्षका लागि बजेटको विनियोजन विधेयकका सिद्धान्त र प्राथमिकतामाथि छलफल भइरहेको छ । तर, अधिकांश सांसद छलफलमा सहभागि छैनन् ।

देश आर्थिक संकटमा छ । सरकारले आगामी आर्थिक वर्षको बजेटका सिदान्त र प्राथमिकतामाथि छललफल गराउन प्रस्ताव लगेको छ र प्रस्तावमाथि छलफल पनि भइरहेको छ । तर, बैठकमा बजेटमाथि चासो देखाउने सांसद छैनन् ।

छलफलमा विभिन्न पार्टीका सांसदहरूले भाग लिएका छन् । छलफलपछि अर्थमन्त्री जनार्दन शर्माले सांसदहरूका जिज्ञासाको जवाफ दिने कार्यक्रम छ आज । दिउँसो सम्म अर्थमन्त्री स्वयम पनि बैठकमा पुगेकै थिएनन् ।

एक चौथाइ सांसदहरूको उपस्थिति रहेसम्म बैठक सुचारु हुने व्यवस्था नियमावलीमा गरिएका कारण जेनतेन संसद्को बैठक अघि बढेको छ । एक चौथाइ संख्या पनि हजिर खातामा मात्रै भेटिन्छ, बस्ने कुर्चीमा सांसद भेटिदैनन् ।

कतिपय अवस्थामा यही गणपूरक संख्या नपुगेकै कारण बैठकअगाडि बढ्न नसकेका उदाहरण छन् । कतिपय सांसद बैठकमै जाँदैनन्, कतिपय गएर पनि हाजिर गरेर फर्कन्छन् । हाजिर भएपछि बैठकमा सहभागी नभए पनि १ हजार रुपैयाँ साधारण र १ हजार रुपैयाँ यातायात गरी दैनिक २ हजार रुपैयाँ भत्ता पाउने व्यवस्था छ ।

मासिक पारिश्रमिकबाहेकको रकम हो यो । मासिक पारिश्रमिक भने बैठकमा सहभागी नभए पनि मिल्छ । अर्कोतर्फ विना जानकारी लगातार १० पटकभन्दा बढी पटक अनुपस्थित भएमा सांसद पद नै गुम्ने नियम छ । कतिपय सांसद यो कानुनबाट बच्न हाजिर लगाएर फर्कने गरेका छन् । कतिपय भत्ताकै लागी हाजिर गर्न संसद् सचिवालयमा पुग्ने र त्यसपछि फर्कन्छन् ।

संसद् भनेको मुलुकको विधि निर्माणको एक मात्रै थलो हो । विधि निर्माण गर्ने जिम्मेवारीका लागि जनताद्वारा चुनिएका प्रतिनिधिहरू संसद्को बैठकमा नजानु भनेको आफ्नो मूल जिम्मेवारीप्रति उदासीन हुनु हो । सांसदहरू आफ्नो मूल जिम्मेवारीप्रति कतिसम्म उदासीन रहेछन् ? भन्ने उदाहरण मंगलबार यताको संसद बैठकमा देखिएको छ ।

सांसदमाथि कस्ता कानुन कसरी बनाउने, तिनमा के–के मापदण्ड राख्ने भन्नेमा ठूलो भूमिका हुन्छ । तर, उनीहरूले आफ्नो आवश्यकता महसुस गरेको पाइँदैन । यही कारण कतिपय अवस्था सांसदहरुमाथि मात्र हैन संसदीय व्यवस्थामै प्रश्न उठ्न थालेको छ ।