मत गन्न बाँकी छँदै विजयी उत्सव मनाइसकेकाे मत जब बराबर भयाे…

५ जेठ, महोत्तरी । देशभर अहिले पालिका निर्वाचनको मतगणना जारी छ । कतिपय पालिकामा मतगणना सम्पन्न भइसकेको छ । मतगणना सम्पन्न पालिकामा यतिबेला निर्वाचित जनप्रतिनिधिले विजयी उत्सव मनाइरहेका छन् ।

तर महोत्तरीको बर्दिबास नगरपालिका–८ को अध्यक्षका मत गन्नै बाँकी छँदै विजयी घोषणा भएपछि दुईजना प्रत्यासीको मत बराबरी आएको छ ।

वडाध्यक्षमा विजय घोषणा हुँदा नेकपा माओवादी केन्द्रका शमसेर सिंहले ७५१ मत र नेकपा एमालेका रुद्रबहादुर किङगरिया मगरले ७४४ मत पाएका थिए ।

एउटा मतपेटिकाको मत गन्न बाँकी छँदै विजयी घोषणा भई नेकपा माओवादी केन्द्रका शमसेर सिंहले विजयी उत्सव समेत मनाएका थिए ।

तर निर्वाचन कार्यालयले एउटा मतपेटिकाको मत गन्न बाँकी रहेको भेटिएपछि सहमतिमै उक्त मतपेटिकाको मतगणना गरिएको थियो । मतगणनाको क्रममा सिंह र मगरले समान ७६७ मत प्राप्त गरेका छन् ।