नयाँ जनप्रतिनिधिले आजदेखि स्थानीय सरकारको कार्यभार सम्हाल्दै

६ जेठ, काठमाडौं । आज शुक्रबारदेखि नयाँ निर्वाचित जनप्रतिनिधिहरुले स्थानीय सरकारको कार्यभार सम्हाल्दै छन् । कुल ७ सय ५३ पालिका मध्ये धेरैको नतिजा आइसकेको छ भने धेरै विजयी उम्मेदवारहरुले शपथ ग्रहण गरी प्रमाणपत्रसमेत लिइसको छन् ।

२०७४ मा निर्वाचत जनप्रतिनिधिहरुको कार्यकाल गएरातीदेखि सकिएपछि नयाँ जनप्रतिनिधिको पाँचवर्षे कार्यकाल शुक्रबारबाट सुरु भएको हो ।

निर्वाचनको अन्तिम मतपरिणाम आउन बाँकी भए पनि ७ सय ५३ पालिकाकै कार्यकाल शुक्रबारबाटै सुरु भएको निर्वाचन आयोगले बताएको छ ।

पछिल्लो परिणामअनुसार नेपाली कांग्रेसले सबैभन्दा धेरै पालिकामा प्रमुख र उपप्रमुख जितेको छ भने नेकपा एमाले दोस्रो स्थानमा छ । अहिलेसम्म प्रमुख पदमा महिलाको संख्या १७ मात्रै छ । तर, उपप्रमुखमा भने ७३ प्रतिशत उपस्थिति छ । अहिलेसम्म पुरुषले जितेका पालिका प्रमुखको संख्या ५८६ छ ।

प्रमुखमा नगन्य रहेका महिलाहरुको संख्या उपप्रमुखमा भने ७३ प्रतिशत छ । अर्थात ४३९ पालिकामा महिला उपप्रमुख रहेका छन् । एमालेले सबैभन्दा धेरै १८७ पालिकामा जितेकामा महिलाको संख्या १६५ छ ।

कांग्रेसले २४६ पालिकामा उपप्रमुख जित्दा महिला १८१ जना र माओवादीले ११५ पालिका उपप्रमुख जितेको छ ।

एकीकृत समाजवादीले जितेका १८ पालिकामा उपप्रमुखमध्ये ९ जना महिला छन । जसपामा १५ र लोसपामा ४ जना महिला निर्वाचित भएका छन्  । अन्य दल र स्वतन्त्र गरी ९ जना महिला उपप्रमुख निर्वाचित भएका छन्  ।