धुर्कोट गाउँपालिकाकाे पहिलाे निर्णय : विद्युतीय चुलो र घरको बीमामा छुटदेखि आवासीय शिक्षासम्म

१० जेठ, तम्घास ।  गुल्मीको धुर्कोट गाउँपालिकाले घरको बीमा र विद्युतीय चुलो खरिदमा छुटदेखि निःशुल्क आवासीय शिक्षासम्मको निर्णय गरेको छ । नवनिर्वाचित गाउँपालिका अध्यक्ष र उपाध्यक्षले सोमबार पदभार ग्रहण गर्दै विद्युतीय चुलो खरिद र घरको बीमा गराउँदा ५० प्रतिशत छुट दिने निर्णय गरेका हुन् ।

प्राकृतिक विपत्तिबाट हुने क्षतिमा राहत उपलब्ध गराउन घरको बीमा गर्ने व्यवस्था मिलाउने र बीमा बापतको प्रिमियम शुल्कमा ५० प्रतिशत अनुदान गाउँपालिकाले दिने निर्णय गरिएको अध्यक्ष भुपाल पोखरेलले  बताए ।

“प्राकृतिक विपत्तिले विगतमा धेरै घरको क्षति भएको छ, यस्ताे अवस्थामा बीमामार्फत केही राहत उपलब्ध गराउन पहल थालेका छाैँ,” अध्यक्ष पोखरेलले भने, “संविधानमा उल्लेख गरिएको आवासको अधिकार गाउँपालिकाले पूरा गर्दै छ ।” पहिलो बैठकबाट दलित परिवारका छोराछोरीलाई एसईई पछिको तीनवर्षे प्राविधिक शिक्षामा १० जना विद्यार्थीलाई छात्रवृत्तिको व्यवस्था गर्ने पनि निर्णय गरिएको छ ।

विभिन्न कारणले आमाबुबा नभएको २० जना विद्यार्थीलाई कक्षा १२ सम्म निःशुल्क शिक्षाको व्यवस्था गर्ने निर्णय गरिएको पालिका उपाध्यक्ष सीता गिरीले जानकारी दिएकी छन् ।