मुख्य निर्वाचन अधिकृतले शपथ गराएपछि बालेनले सुनितासहितका जनप्रतिनिधिलाई शपथग्रहण गराउने

१५ जेठ, काठमाडौं । काठमाडौं महानगरपालिकाका नवनिर्वाचित जनप्रतिनिधिहरूलाई सोमबार शपथग्रहण गराइने भएको छ । मुख्य निर्वाचन अधिकृतले महानगरमा मेयर, उपमेयर, वडाध्यक्ष र वडासदस्यको शपथग्रहण कार्यक्रम राखेका हुन् ।

सोमबार बिहान ११ बजे काठमाडौंका मुख्य निर्वाचन अधिकृतले स्वतन्त्रबाट निर्वाचित महानगरका मेयर बालेन्द्र शाह (बालेन)लाई शपथग्रहण गराउने कार्यक्रम रहेको छ । त्यसपछि मेयर शाहले अन्य जनप्रतिनिधिहरूलाई शपथग्रहण गराउनेछन् ।

राष्ट्रिय सभागृहमा हुने शपथग्रहण कार्यक्रमपछि मेयर शाह र उपमेयर सुनीता डंगोलले पदभार ग्रहण गर्नेछन् । महानगरका कुल ३२ वडामध्ये १९ वडाको नेतृत्व नेपाली कांग्रेसले लिएको छ । नेकपा एमालेले १२ र नेकपा एकीकृत समाजवादीले एउटा वडाको नेतृत्व लिएको छ ।