काठमाडौं महानगरका मेयर बालेनलाई खतिवडाले गराए शपथग्रहण

१६ जेठ काठमाडौं । काठमाडौं महानगरपालिकाका नवनिर्वाचित मेयर बालेन्द्र साह (बालेन) ले शपथग्रहण गरेका छन् । सोमबार बिहान राष्ट्रिय सभागृहमा मुख्य निर्वाचन अधिकृत राजुकुमार खतिवडाले मेयर साहलाई शपथग्रहण गराएका हुन् ।

नेपाली भाषामा शपथग्रहण गरिसकेपछि उनले नेपाल भाषामा पनि शपथको व्यहोरा वाचन गरेका थिए । मेयर साह शपथग्रहण समारोहमा दौरा सुरुवाल र भादगाउँले टोपी लगाएर सहभागी भएका थिए ।  नवनिर्वाचित उपमेयर सुनिता डंगोलले समेत पद तथा गोपनियताको शपथग्रहण गरेकी छिन् ।

उपमेयर डंगोललाई मेयर साहले शपथग्रहण गराएका हुन् । उपमेयर डंगोलले भने नेपाल भाषामै शपथ लिएकी हुन् । मेयर साहले नेपाली भाषामा शपथग्रहण गराउँदा डंगोलले नेपाल भाषामा शपथ लिएकी हुन् ।

मेयर साहले काठमाडौं महानगरपालिकाका नवनिर्वाचित वडाध्यक्ष, नगर कार्यसमिति सदस्यहरूलाई समेत पद तथा गोपनियताको शपथग्रहण गराएका छन् ।

राष्ट्रिय सभागृहकाे शपथपछि आजै प्रमुख साह र उपप्रमुख सुनीता डंगोलले कार्यालयमा पुगेर पदभार ग्रहण गर्ने कार्यक्रम तय भएकाे छ ।