हदम्याद हटाउन माग गर्दै कांग्रेसका महिला सांसदले दर्ता गराए संकल्प प्रस्ताव

१६ जेठ, काठमाडौं । सत्तारूढ दल नेपाली कांग्रेसका महिला सांसदहरूले बलात्कार सम्बन्धी मुद्दामा हदम्याद हटाउने सम्बन्धी संकल्प प्रस्ताव संघीय संसद् सचिवालयमा दर्ता गराएका छन् ।

सोमबार पार्टी केन्द्रीय सदस्यसमेत रहेकी सांसद् डा. डिला संग्रौलाको नेतृत्वमा सांसदहरू सुजता परियार, प्रमिला राई र रंगमती शाहीले संयुक्त रूपमा संघीय संसद् सविचालयमा दर्ता गराएका हुन् । उनीहरुले आफ्नो प्रस्ताव तत्काल प्रतिनिधिसभामा पेश गर्ने अनुमति मागेका छन् ।

कांग्रेसका चार सांसदले दर्ता गरेको संकल्प प्रस्तावमा पीडितले उजुरी गर्न नसक्नुको भरपर्दो र मनासिव कारण देखाई उजुर गर्न आएमा दर्ता गरी अनुसन्धान गर्न सक्ने गरी कानुन संशोधन गर्ने उल्लेख छ ।

मुलुकी अपराध संहिताको दफा २२९ मा ‘जबर्जस्ती करणीसम्बन्धी मुद्दामा ‘कसुर भएको मितिले एक वर्षभित्र र यस परिच्छेद अन्तर्गतको अन्य कसुरमा त्यस्तो कसुर भएको कुरा थाहा पाएको मितिले तीन महिना नाघेपछि उजुर लाग्ने छैन’ भन्ने व्यवस्था छ ।

तर पछिल्ला समय ‘मी टू’ अभियान अन्तर्गत वर्षौं पुराना बलात्कारका घटनाहरु सार्वजनिक हुन थालेपछि हदम्याद हटाउनुपर्ने माग उठेको छ । कांग्रेस संसदहरु डिला संग्रौला, सुजाता परियार, प्रमिला राई र रंगमती शाहीले संकल्प प्रस्ताव दर्ता गराएका हुन् ।