सरकारले चुनावमा भोट तान्ने बजेट ल्यायो, तपाइहरु त्यसको भण्डाफोरतिर लाग्नुस्ः ओली

१६ जेठ, काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले सरकारले ल्याएको नयाँ आर्थिक वर्षको बजेटको भण्डाफोर गर्न निर्देशन दिएका छन् ।

सोमबार संसद भवन नयाँ बानेश्वारमा बसेको एमाले संसदीय दलको बैठकमा ओलीले सबै तहबाट बजेटको विरोध गर्न निर्देशन दिएका हुन् ।

उनले सरकारले ल्याएको बजेट चुनावमा भोट माग्ने किसिमले मात्रै भएको र यसले मुलुकको अर्थतन्त्रको यथार्थलाई सम्बोधन गर्न नसक्ने अनुचित ढंगले बजेट ल्याएको टिप्पणी गरे ।

ओलीले बजेटलाई जनताको बीचमा भण्डाफोर गरेर असफल बनाउन पार्टीका सांसदहरुलाई निर्देशन दिए ।

बैठकमा सहभागि एमाले सांसदका अनुसार ओलीले बजेट बिना सिद्धान्त र प्राथमिकताको आधारमा आएको भन्दै भण्डाफोर हुने गरी जनताको बीचमा लैजान भनेका हुन् ।

बैठकमा अध्यक्ष ओली, पूर्वअर्थमन्त्रीहरु विष्णु पौडेल, सुरेन्द्र पाण्डे, युवराज खतिवडाले बजेटबारे सांसदहरुलाई जानकारी दिएका थिए ।