पौडेललाई रिजालको उत्तर, एमालेको घोषणापत्रका कार्यक्रम लागु गर्न यो सरकार बाध्यकारी छैन्’

१७ जेठ, काठमाडौं । नेपाली कांग्रेसका नेता मिनेन्द्र रिजालले सरकारले ल्याएको आगामी आर्थिक वर्षको बजेटमाथि विपक्ष दलको टिप्पणी अस्वभाविक रुपले आएको बताएका छन् । उनले एमालेले दावी गरेअनुसार नभइ बजेट समयानुकुल आएको र यो सरकारले एमालेको घोषणपत्रमा राखिएका कार्यक्रम लागु गर्नुपर्छ भन्ने बाध्यकारी अवस्था नरहेको बताएका छन् ।

प्रतिनिधिसभाको मंगलबारको बैठकमा आर्थिक वर्ष २०७९/०८० को राजश्व र व्ययको वार्षिक अनुमानमाथि सामान्य छलफलमा सहभागी हुँदै उनले बजेटमा समेटिका कार्यक्रम र रकम विनियोजन समयअनुकुल भएको बताए । उनले एमालेलाई आफुले ल्याएको बजेट हेरेर अहिलेको बजेटको समीक्षा गर्न पनि आग्रह गरे ।

आफूभन्दा अगाडि बोलेका एमाले नेता तथा पूर्वअर्थमन्त्री विष्णु पौडेललाई जवाफ दिँदै रिजालले भने, ‘संसद छलेर तपाइँले ल्याउनु भएको बजेट एक पटक हेर्नुहोस् । अहिले भन्नुभएको अघिल्लो वर्ष तपाइँले ल्याएको बजेटमा समेट्नु भएको भए हुन्थ्यो राम्रो हुने थियो ।’

सामाजिक सुरक्षाभत्ता पाँँच हजार नपु¥याएकोमा पौडेलको असन्तुष्टिप्रति रिजालले भने, ‘तपाइँको पार्टीको घोषणापत्रको कार्यक्रम यो सरकारले किन लागु गर्ने ?। एमालेको घोषणापत्रमा राखिएका कार्यक्रम लागु गर्नुपर्ने विषयमा यो सरकार बाध्याकारी छैन् ।’

भूमिका फेरिएसँगै विचार फेर्ने प्रवृत्ति नेताहरुले त्याग्नुपर्ने बताउँदै उनले अघिल्लो वर्ष एमाले सरकारले ल्याएको बजेट पनि चुनाव लक्षित नै रहेको स्मरण गराए । बजेटमा सबैका इच्छा र आकांक्षा समेटिन नसकिने यथार्थतलाई नभुल्न आग्रह गर्दै रिजालले बजेटमा धेरै विषय समेटिएको बताए ।