डीआईजी र एआईजीको मुद्दालाई एकै ठाउँमा राख्न सर्वोच्चको आदेश, पोखरेलको सम्भावना न्यून बन्दै

१७  जेठ, काठमाडौं । सर्वोच्च अदालतले नेपाल प्रहरीको प्रहरी महानिरीक्षक र प्रहरी अतिरिक्त महानिरीक्षक बढुवा विवादबारे दायर रिटको सुनुवाइ गर्दै दुबै मुद्दालाई एकै ठाउँ ‘लगाउ’मा राख्न आदेश दिएको छ । यो आदेशसँगै एआईजी विश्वराज पोखरेलको मुद्दा जितेर आईजीपी बन्ने सम्भावना कम भएको छ ।

न्यायाधीशद्वय विश्वम्भरप्रसाद श्रेष्ठ र डा. कुमार चुडालको संयुक्त इजलाशले उक्त आदेश दिएको हो । यो आदेशसँगै अर्को पटक पेशी तोकिएपछि मात्रै संयुक्त मुद्दामाथि सुनुवाई हुनेछ । इजलाशको यो आदेशसँगै एआईजी पोखरेलको आईजीपी हुने सम्भावना टर्दै गएको चर्चा प्रहरी बृतमा हुन थालेको छ ।

रिट निवेदक पोखरेलले रिटमार्फत आफू पहिले एआईजी भएको र वरिष्ठताका आधारमा प्रहरी महानिरीक्षक (आईजीपी) नियुक्त गरिनुपर्ने माग गरेका छन् । वर्तमान आईजी धीरजप्रताप सिंहलाई काममा रोक लगाउन पनि पोखरेलको माग छ ।

यस्तै, सिंहलगायतलाई प्रहरी नायव महानिरीक्षक (डीआईजी) बाट एआईजी बनाउँदा पनि वरियता मिचेर बढुवा गरेको भन्दै तत्कालीन डीआईजीहरू ईश्वरबाबु कार्की, प्रकाशजंग कार्की र घनश्याम अर्यालले रिट दायर गरेका थिए ।

हाल सेवा निवृत्त भइसकेका तीन डीआईजी र एआईजी पोखरेलको मुद्दालाई न्यायाधीशद्वयको इजलाशले ‘लगाउ’मा राख्न आदेश दिएको हो ।